سولې ته نظم/ مینه انتظار

مينه انتظار

څڼورو زلمو راسئ سوله راوئ
څڼورو زلمو ستړي یو ، له جنګه
چي اور بند سي سوله وسي امن جوړ سي
بیا به خوند واخلو ،دشنو بنګړیو شرنګه

ته پوهېږې چي ته راسې سوله راوړې؟
زما ګل جانان به خلاص سي له قیدونو
بیا به نه وړمه اغزي په ماتو پښو کي
زړه مي تور دی د باګرام له دېوالونو

په کلو به، انتظار دیدار ته نکړو
ګلالي زلمي چي راسي تر کورونو
ځنځیرونه به ناباب جرم به مړ وي
دراوزې به سي را قلف د محبسونو

څڼور لالیه، دغه مي ارمان دی
چي لاس سره بنارسۍ مي پر اوږو وي
چي د نوي ژوندانه خوب مي رښتیا سي
چي میده میده اواز ، د زمزمو وي

چي لونګۍ سي په قیمت تابوت لیلام سي
په دا هیله مي کلونه ژوندون تېر کړ
ګوندي ږغ د ناببره مرګي ورک سي
ما په دغه امید تللی لالی هېر کړ

بیا به نه وړمه، ډېوې تر زیارتونو
د لیلا یاد به مي هم مورکۍ ازاد کړي
طالب جانه؛ که له سولي سره راغلې
د مورکۍ د زړه دعا به دي اباد کړي

که ته راغلې او د سولي وزر خپور سو
دغه تور تور ماښامونه، به سبا سي
درنه جار به کړم یوه کندهارۍ غاړه
خو که دا د ناویتوب خوب مي رښتیا سي

څڼور لالیه داسی خوب مي ولید!
شاپېرۍ راکښته سوي وي له غرونو
ملایکي وي د مځکي پر سر باندي
انسانان وي ، د اسمان پر کنارونو

مرور لالیه ، دغه وعده راکړه
چي راځې مګر قلم به درسره وي
ټوپک مات کړه او شپېلۍ کړه ترېنه جوړه
د خوږمنو ، زړو ملهم به درسره وي

موږ په یوه نامه بندي په بل مړه کېږو
څوک شهید سي په ناحقه توهمتونو
زه به نه مرم! زه به ولي نه مړه کېږم؟
لوبي وسولې ، په ډېرو عزتون

چي اور بند وي د بارودو لوګی نه وي
وخت به تېر وي د ململ پر بنډلونو
بیا به پوه سمه چي سوله ده اور بند دی
چي ستن ماته سي د څرخ پر بیرغونو

ته خبر یې ته پوهېږې طالب جانه؟
چي زه څومره یم حالاتو زورولې!
د ژوندون له خوشحالیو یم محرومه
دومره ډېره یم ، غمونو کړولې

بس یوه دغه خوشحالي خو را پېرزو که
ته پخلا سه ته له<میني>سره راسه
د مرګونو لمن ټوله له وطن که
دردېدلو پښتنو ته مسیحا سه

ټاګونه

ورته لیکنې

avatar
1 د تبصرو شمېر
0 د ځوابونو شمېر
0 ار ایس ایس کې ګډونوال - څارونکي
 
ډېر غبرګون شوې تبصره
تر ټولو ګرمه موضوع
  ګډون وکړئ  
نویو زړو ډیرو خوښو شویو
خبرتیا غوښتل د
مختار
میلمه
مختار

زبردست، الله تعالی دی ارمان پوره کړه

Back to top button
Close
Close