د پاکستان دولتي راډيو: علي وزير او محسن دوړ د افغانستان له لارې د هند اجنډا پر مخ بیايي

نن ټکی اسیا (سه شنبه، ۲۰ کب، ۱۳۹۸ل): د پاکستان دولتي راډيو ادعا کړې، چې د پښتون ژغورنې غورځنګ مشران او د ملي اسامبلۍ غړي علي وزير او محسن دوړ د افغانستان له لارې د هند اجنډا پر مخ بيايي.

د دولتي راډيو له لوري په خپاره شوي راپور کې راغلي، د وزيرستان د خلکو دواړه پارلماني استازي د بهرنيانو په مرسته د پاکستان پر خلاف فعاليتونه کوي.

د راډيو ټلويزون په راپور کې په دې هم نيوکه شوې وه، چې کابل ته د علي وزير او محسن دوړ په رسېدو ولې د افغان دولتي عسکرو له لوري د هغوی تود هرکلی شوی دی.

د رپوټ له خپرېدو وروسته د دولتي راډيو له ويب پاڼې دا راپور بېرته لرې شو او همدارنګه له ټويټر اکاونټ څخه يې هم ټويټ لرې شوی دی.

تېره ورځ د کابل حکومت د مشر اشرف غني د لوړې مراسمو ته د نورو بهرنيو مېلمنو سربېره ۲۳ پښتانه سياستوال راغوښتل شوي وو، چې ۲۱ يې په يوه ځای کابل ته راغلل، خو پاکستاني ځواکونو د يکشنبې په ورځ علي وزير او محسن دوړ ته اجازه ورنه کړه او بيا د دوشنبې په ورځ د لومړي وزير عمران خان په ځانګړې اجازه د تورخم له لارې کابل ته راغلل او د اشرف غني د لوړې په مراسمو کې يې ګډون وکړ.

د دولتي راډيو ټلويزون سربېره د پاکستان د مواصلاتو وزير مراد سعيد او يو شمېر نورو رسنيو هم په کابل کې د علي وزير او محسن دوړ په تود هرکلي نيوکې کړي دي.

پاکستاني رسنيو د دې تورونو لپاره کوم اسناد نه دي وړاندې کړي.