د فاریاب والي: امریکایي قوماندان مې په اوښکو او ژړا رخصت کړ، له یو غوره دوست بې برخې شوم

نن ټکی اسیا (جمعه، ۲۳ کب، ۱۳۹۸ل): وروسته له هغه، چې د کابل حکومت له لوري د فاریاب د والي «نقیب الله فایق» او یوه امریکایي قوماندان د مخه ښې انځورونه ټولنیزو رسنیو ته راووتل، تاوده غبرګونونه یې راوپارول.

په خپرو شویو انځورونو کې ښکاري، چې نقیب الله فایق ته د خپل امریکایي دوست د فراق غم د زغم وړ نه دی او د هغه له سترګو یې اوښکې بهولې، له دې صحنې سره فایق په خپل ټویټر لیکلي « نن مې له یوه ښه ملګري سره خدای پاماني وکړه، بوګرد په شمال کې د امریکایي ځواکونو قوماندان وو، دده له امله فاریاب د سقوط له خطر څخه خلاص وو.»

نوموړي زیاته کړې «موږ ډيپلوماټیک دودونه مات کړل او د رخصتېدو په مهال مو له یو بل سره اوښکې توی کړې، هغه واشنګټن ته ولاړ او اوس زه ویلای شم چې په واشنګټن کې یو د حساب ملګری لرم.»

دغه توري که څه هم د فاریاب والي له خپل ټویټر ډيليټ کړي؛ خو سکرین شاټ یې لا هم د ټولنیزو رسنیو تر ټولو ګرمه موضوع ده.

د حارث مجاهد په نامه یو تن ورسره لیکلي « والي صاحب غم یې مه کوه بیا به په اخرت کې ورسره یو ځای شې!»

د عبدالرحیم رحیمي په نوم یو بل فعال بیا په طنزیه ډول طالب مخاطب کړی او لیکلي یې دي «
طالبه، خدای ته به څه جواب ورکوي چي دا دوه مینان دي سره جدا کړل.»

د امرالله خان په نامه یو بل تن بیا یو بیت شعر ورته ډالۍ کړی «که واشینګټن ته درومی دا کوربانه درسره بوزئ
، ډیره له تاسو سره مینه لري دا خره غوایي درسره بوزئ.»

ثناءالله صالح خیل لیکلي «یواځې د فاریاب والي فایق نده! بلکې د ټول نظام یې همدا حال دی، له اشرف غني عبدالله او نور ټول هغه چې تیر ۱۹ کلن اشغال یې په ځان منلی و، ټول د امریکا له وتلو سره د فایق په سرنوشت اخته کېږي.د ځینو سر له اوسه خپلې شخصي ګټې په خاطر کې دي.»

سیاسي فعال او د چارو شنونکی « نظر محمد مطمئن» بیا وایي «تر یوې پیړۍ همدا شرم د فاریاب والي نقیب الله فایق او د ده کورنۍ ته په میراث پاتې شو، والي او امریکایې جنرال دواړه د مخې ښې په وخت کې د یو بل په جدایې خفه او دواړه ژاړي، د پخواني په نوم محاهد زوی، ننۍ والي له افغانستان څخه د امریکایې پوځیانو.په وتلو دومره خفه دی چې عام محضر کې هغه د یوې بې وسه ښځې په څیر اوښکې تویوي.»