کرونا ويروس؛ حکومت له طالبانو سره اوربند ته چمتووالی ښودلی

نن ټکی اسیا (چهارشنبه، ۲۸ کب، ۱۳۹۸ل): د اشرف غني سلاکار وحيد عمر ويلي، حکومت د اروپايي ټولنې هغه وړانديز منلو ته حاضر دی، چې د کرونا ويروس له امله دې په افغانستان کې اوربند وشي.

ښاغلي وحيد عمر په خپل ټويټر پيغام کې پر طالبانو هم غږ کړی، چې خپل بریدونه ودروي، تر څو روغتيايي ټيمونه په اغېزمنو سيمو کې خپل فعالیت وکړی شي.

نوموړي زياته کړې: «طالبان بايد پوه شي، چې موږ د کرونا له امله له یوه بشري وضعيت سره مخ يو او دوی بايد خپل بریدونه ودروي، تر څو روغتيايي ټيمونه وکولی شي، د افغانستان په ټولو سيمو کې فعاليت وکړي.»

وحيد عمر دا څرګندونې افغانستان لپاره د اروپايي ټولنې د ځانګړي استازي رولانډ کوبيا د هغه وړانديز په ځواب کې کړي، چې د کرونا ویروس له امله دې په افغانستان کې اوربند وشي.

We welcome the EU call for a ceasefire on humanitarian grounds. Taliban should know that we are dealing with a humanitarian situation caused by the Corona virus. They need to stop their attacks and allow health workers to reach to vulnerable people in all parts of Afghanistan.

— Waheed Omer (@Waheed_Omer) March 18, 2020

تر هغه وړاندې د هرات ولايتي چارواکو هم له طالبانو غوښتي وو، چې د کرونا ويروس د خپرېدو مخنيوي په موخه دې اوربند وکړي.

طالبانو ويلي، د کرونا ويروس د مخنيوي لپاره له نړيوالو روغتيايي مؤسسو سره ته همکارۍ ته تیار دي.

په قطر کې د طالبانو د سياسي دفتر وياند محمد سهيل شاهين ويلي، د دوی د صحت کميسيون د روغتيا له نړيوالو مؤسسو سره د کرونا ويروس د مخنيوي لپاره همکارۍ ته حاضر دي، خو د اروپايي ټولنې او د کابل حکومت له لوري د اوربند وړانديز په اړه يې تر اوسه غبرګون نه دی ښودلی.