فارن پاليسي: د اشرف غني حکومت هم د نجيب د رژيم په څېر له بهرنيو مرستو پرته دوام نه شي کولی

نن ټکی اسيا (یکشنبه، ۱۰وری، ۱۳۹۹ل): فارن پاليسي خپرونې د امريکا له لوري د اشرف غني پر حکومت د يو ميليارد ډالرو مرستو کمولو په اړه ليکلي، چې اوسنی حکومت درې لسيزې مخکې د کميونيسټ نجيب الله له رژيم زيات پر بهرنيو مرستو ولاړ دی.
د افغانستان د چارو امريکايي کارپوه او پخواني ډيپلوماټ بارنيټ روبين فارن پاليسي ته په دې مقاله کې ليکلي، د تېرې پېړۍ په ۱۹۸۹ کې، چې شوروي عسکر له افغانستانه ووتل، مجاهدين د هېواد پر لويو لارو او ښارونو واکمن شول، خو کله چې د پخواني کميونسټ ولسمشر نجيب الله پر حکومت بهرنۍ مرستې بندې شوې او بهر ته د طبيعې ګازو صادرات هم بند شول، په ۱۹۹۲ کال کې حکومت سقوط وکړ.
د ليکوال په وينا د بهرنيو مرستو له بنديدو وروسته د دولتي عسکرو تنخواوې بندې شوې، چې په پایله کې يې ډېری عسکرو خپلې دندې پرېښودې او يا يې هم ځانونه مجاهدينو ته تسليم کړل چې بالاخره د ۱۹۹۲ په اپرېل مياشت کې د کميونيسټ نجيب حکومت نسکور شو او مجاهدين کابل ته ننوتل.
بارنيټ روبين وايي، د افغانستان اوسنی حکومت د نجيب له رژيم زيات پر بهرنيو مرستو ولاړ دی.
ليکوال دا مقاله وروسته له هغه خپره کړې، چې تېره اونۍ د امريکا د بهرنيو چارو وزير مايک پومپيو د اشرف غني او عبدالله ترمنځ د جوړجاړي په موخه کابل ته راغلی و او هڅه يې وکړه چې دواړه په ګډ حکومت سره راضي کړي خو په خپلو هڅو کې ناکام شو او له کابله نهيلی ستون شو.

د امريکا د بهرنيو چارو وزارت ويلي و، د اشرف غني او عبدالله اختلافات د امريکا ملي ګټو ته ګواښ دي او له همدې امله يې پر حکومت د يو مليارد ډالرو مرستو بندولو پرېکړه کړې او ويلي يې دي، چې راتلونکي کال ته به هم ورته ګام پورته کړي.
بارنيټ روبين وايي، اوسنی حکومت درې لسيزې وړاندې د کميونسټ ولسمشر نجیب الله له حکومت زيات پر بهرنيو مرستو ولاړ دی او هغه، چې د بهرنيو مرستو له بنديدو سره سقوط وکړ، اوسنی حکومت هم پر خپل حال نشي پاتې کېدای.