بدخشان: ګډو ځواکونو ۸ تنو ملکي وګړو ته مرګ ژوبله اړولې

نن ټکی اسيا (يکشنبه، ۱۷ وری، ۱۳۹۹ل): د بدخشان ولايت په جرم ولسوالۍ کې ګډو ځواکونو د ملکي وګړو په کورونو هوايي بريدونه کړي دي چې په نتيجه کې يې ۸ تنو ملکي وګړو ته مرګ ژوبله اړولې ده.

راپورونه وايي چې ددې ولايت جرم ولسوالۍ په اب راغک او شفچان سيمو کې امريکايي او داخلي عسکرو د ملکي وګړو په پنځو کورونو بمبار کړی دی چې په نتيجه کې یې ۲ ښځې او ۲ ماشومان وژلي او ۴ تنه نور يې ټپيان کړي دي.

دا په داسې حال ده چې تيره ورځ په روزګان او زابل ولايتونو کې هم د ګډو ځواکونو په هوايي بريدونو کې پنځلس تنه ملکي وګړو ته مرګ ژوبله اوښتې وه.

که څه هم د طالبانو او امريکا ترمنځ د شوي توافقنامې له مخې امريکا نشي کولی چې په افغانستان کې هوايي بريدونه وکړي، خو له هغه تړون راورسته دا څويم ځل دی چې امريکايي الوتکې د ملکي وګړو په کورونو هوايي بريدونه کوي.

تيره ورځ په روزګان او زابل ولایتونو کې د وروستيو بريدونو په غبرګون کې د طالبانو وياند قاري محمد يوسف احمدي ويلي دي چې دا ډول جنايات د توافقنامې ښکاره نقض دی او په وينا يې چې د بدو عواقبو مسؤليت به يې هم د سرغړونکو په غاړه وي.