کرونا/ حسان ضعيف

د خدای قدرت دی نن مې داسې افسانه ولیده
مرغان ازاده قید په کور مې زمانه ولیده

د ازادي شعار خاموش ولو په هره خوله کې
نن مې مایوسه بشردوسته بهانه ولیده

چې یې حجاب ته بد ویل حجاب یې نه منلو
خوله مې تړلې نن د هغې زنانه ولیده

د زهر غوړپ جام د زقوم وو او عذاب چا لره
څوک مې خوشحاله د رحمت په خزانه ولیده

حمد و ثنا ده تل و تاته لا مثال خالقه
ما بې ارزښته نن هر څه دانه دانه ولیده

حسان ضعیفه دنیا ټوله په خپل غم اخته وه
خو یو څه تنه مې د عشق پر میخانه ولیده