د چارواکو نه پاملرنه؛ د پکتیکا په محبس کې یو بندي وفات شوی

نن ټکی اسیا (یکشنبه، ۲۱ غوايي، ۱۳۹۹ل): د پکتیکا ولایت په مرکزي محبس کې یو بندي د درملنې نه ترلاسه کولو له امله وفات شوی دی.

د پکتیکا د مرکز ښرنې د مدنې ټولنې غړي وايي، وفات شوی بندي عبدالغني د زرشک ځوی ددې ولایت د ارګون ولسوالۍ «دمګړ» کلي اوسېدونکی په مرکزي محبس کې له تیرې څه مودې راهیسې ناروغ ؤ.

د ټولنې غړو رسنیو ته ویلي، دغه ناروغ بندي یې د مرکز ښرنې روغتون ته راوستلی ؤ، چې ډاکټرانو یې له درملنې څخه ځانونه ناچاره وګڼل او سپارښتنه یې وکړه، چې ژر ترژره کابل انتقال شي؛ خو د محبس چارواکو ورته په بیلابیلو پلمو اجازه نه ورکوله، تردې چې نوموړي بندي تیره ورځ خپل ژوند له لاسه ورکړ.

د طالبانو د بندیانو چارو کمیسیون هم دغه پېښه غندلې او له نړیوالو بشري سازمانونو یې غږ کړی، چې د افغان دولت په زندانونو کې له بندیانو سره د روان زور زیاتي په اړه خپل مکلفیت ترسره کړي: «د اسلامي امارت د بندیانو چارو کمیسیون له بندیانو سره د کابل ادارې د چارواکو بې غوري او په قصدا د مرګ خولې ته ورکول په کلکه غندي او له نړیوالو بشرپالو نهادونو او سازمانونو څخه یوځل بیا په کلکه غوښتنه کوي چې د کابل ادارې په زندانونو کې د روان وحشت او ظلم د مخنیوي لپاره خپل انساني مکلفیت ادا کړي.»

په ورته وخت کې د پکتیکا ولایت مدني فعالان هم حکومت تورنوي، چې د بندیانو روغتیا او ژوند ته هیڅ ارزښت نه ورکوي، دوی خبرداری ورکړ، که حکومت په دې اړه بې توجهي وکړي، ښايي ولس ددې ناوړه حالت په وړاندې پاڅون وکړي.