حقاني: په مذاکراتو باور لرو؛ خو د نظامي ځواک له تقویې څخه غافل نه یو

نن ټکی اسیا (دوشنبه، ۱۲ غبرګولى، ۱۳۹۹ل): د طالبانو د مشر مرستیال خلیفه سراج الدین حقاني وايي، د مذاکراتو له لارې د لانجې په حل باور لري؛ خو ددې ترڅنګ به د خپل نظامي قوت له تقویې څخه هم غفلت نه کوي.

د «فاتح ځواک» په نوم د طالبانو د فرهنګي کمیسیون لخوا خپاره شوي فیلم د «رسم ګذشت» برخه کې د نورو طالب مشرانو ترڅنګ د طالبانو د مشر مرستیال او حقاني شبکې مشر خلیفه سراج الدین هم د غږیز پیغام په واسطه وینا اورولې ده.

په دغه وینا کې خلیفه حقاني د «عالي تکتیکونو» او «جنګي مهارتونو» له کبله د طالبانو نظامي قوت په اړه ویلي او په خبره یې طالبان اوس هرقسم منظم پوځي قطعات لري، چې کولای شي په لنډ وخت کې د «دښمن» مقابله وکړي.

حقاني دغه راز د پوځي تیاریو او آن د وسلو د جوړولو برخه کې د خپل چمتووالي ترڅنګ په مذاکراتي پروسې هم رڼا اچولې او خبرداری یې ورکړی، چې د دوی له مذاکراتو څخه څوک ناسم تعبیر نه کوي:

«مونږ د مسائلو حل د مذاکراتو له لارې غواړو، نبوي شرعي سیاست زمونږ د جهاد او مبارزې یو لاره ده؛ خو سیاست او مذاکرات څوک باید په دې معنا وانخلي چې مونږ به له جهادي چارو او د خپل جهادي نظامي ځواک د تقویې او پرمختګ څخه غافله شو»

د «رسم ګذشت» په نوم مراسمو تر عنوان لاندې د طالبانو د نظامي کمیسیون د هیئت په وړاندې په انفجاري واسکټونو سمبالو او موټربمونو سرتیرو بریدګرو ترڅنګ په لیزري او توپچي وسلو سمبالو او نورو مختلفو پوځي دندو ترسره کوونکي ځانګړي قطعات نندارې ته وړاندې شوي دي.

د طالبانو د مشر مرستیال سراج الدین حقاني په داسې مهال د مذاکراتو ترڅنګ د خپل پوځي ځواک غښتلي کولو خبره کوي، چې ټاکل شوې ده په راتلونکو څو اونیو کې د طالبانو او افغان سیاسي جهتونو ترمنځ بین الافغاني مذاکرات پیل او په ترڅ کې یې د افغانستان ۴۰ کلنې جګړې ته د پای ټکی کیږدي.