د ژوند کيسه/ فضل باري مشفق

فضل باري مشفق

چې ډکه له غمونو نه کيسه د ژوندانه ده
دا ځکه پاڼه مړاوې او پيکه د ژوندانه ده

مرګونه دي، ويرونه دي، سلګۍ او فريادونه
اوس دغسې بې خونده ننداره د ژوندانه ده

يو خښ شي او د بل د جنازې اعلان تر غوږ شي
وتلې بس له چمه جنازه د ژوندانه ده

افت دی، که عذاب دی، که وبا ده خو څه شته دي
خو ځينو ته بيا دغه ډرامه د ژوندانه ده

رڼا ده رانه ورکه له تيارو پسې روان يو
دا ځکه مو په برخه توره شپه د ژوندانه ده

چې ستړی، لالهاند شم او غمونه مې راګير کړي
د مور په لاسو شونډې مې دمه د ژوندانه ده

تيار شئ، کفنونه ځان نه تاو کړئ ځئ چې ځو
اوس دا ډول مشفقه فيصله د ژوندانه ده

فضل باري مشفق

2020/06/16 سه شنبه