سعودي د سږني حج په اړه رسمي پریکړه اعلان کړه
نن ټکی اسیا (سه شنبه، ۳ چنګاښ، ۱۳۹۹ل): د سعودي حکومت په نړۍ کې د خپرې شوې کرونا وبا له کبله د روان ۲۰۲۰م کال د حج فریضې په اړه رسمي پریکړه اعلان کړه چې له مخې به یې بهرنیان نه شي کولی د حج فریضه ادا کړي.
د سعودي د حج او عمرې وزارت لخوا په خپره شوې اعلامیه کې ویل شوي چې د کرونا وبا د خپریدو مخنیوي په خاطر یوازې هغه کورني او بهرني کسان چې په سعودي کې میشت دي په محدوه پیمانه حج کولی شي.
د یادې اعلامیې له مخې د حج او عمرې وزارت زیاتوي، «د نړۍ په ۱۸۰ زیاتو هېوادونو کې د کرونا ویروس خپریدو ته په کتلو د حج فریضه محدوده کړل شوه، د کومې له مخې به د مختلفو تابعیتونو خلک چې په سعودي کې میشت دي په محدود ډول په روغتیایي خوندیتوب کې کولی شي حج ادا کړي».
نص البيان الصادر عن وزارة الحج والعمرة بشأن إقامة الحج هذا العام pic.twitter.com/z9B2O1jR2Z
— وزارة الخارجية 🇸🇦 (@KSAMOFA) June 22, 2020
د سعودي حکومت له دې وړاندې د کرونا ویروس د خپریدو مخنیوي په پار په مارچ میاشت کې عمره ځنډولې وه، او ددغه هېواد ۹۰ زره جوماتونه یې تړلي وو چې وروسته یې د پرانیستلو پریکړه وکړه.
دغه راز یاد حکومت په نورو هېوادونو غږ کړی و چې د حج په اړه خپل پلانونه وځنډوي تر څو د کرونا ویروس په اړه لید روښانه شي. په دې لړ کې اندونیزیا او مالیزیا خپل وګړي حج ته له تلو منع کړي دي.
د سعودي حکومت د تیرې ورځې پریکړې په ملیونونو انسانان ناراضه کړل، څوک چې د خپلو مصارفو زیاته برخه د حج په ادا کولو لګوي، او ځینې خو یې کلونه کلونه د حج کولو لپاره انتظار باسي تر څو د سعودي چارواکو خوښه او منظوري ترلاسه کړي.
د سعودي هېواد د احصائیو لپاره د عمومي ادارې د معلوماتو له مخې تېر ۲۰۱۹م کال نږدې ۲ ملیونه او ۴۹۰زره کسانو د حج فریضه ادا کړې وه، په داسې حال کې چې ۶۳۴زره یې په سعودي کې وو، په دې کې ۲۱۱زره سعودیان او پاتې نور د نورو تابعیتونو خلک وو، هغه کسان چې له نورو هېوادونو حج ته تللي وو شمېر یې یو ملیون او ۷۵۵زره تنه و چې زیاته برخه یې له اسیایي هېوادونو څخه و.
