کابلوف: امریکا د بې بنسټه راپورونو په خپرولو غواړي، افغانستان کې خپله ماتې پټه کړي
نن ټکی اسیا (دوشنبه، ۹ چنګاښ، ۱۳۹۹ل): د افغانستان لپاره د روسیې ځانګړي استازي «ضمیر کابلوف» د امریکايي رسنیو هغه راپورونه چې روسیه پکې د امریکايي عسکرو د وژلو په بدل کې طالبانو ته په پيسو ورکولو تورنه شوې وه، په افغانستان کې د امریکا د ماتې د توجیه هڅه بللې.
اسپوتنیک خبري اژانس د کابلوف له قوله لیکلي «په امریکا کې داسې عسکر نشته، چې له افغانستانه په وتلو کې دلچسپي نه لري، هغوی هڅه کوي په افغانستان کې خپله ماته د بې اساسه راپورونو په خپرولو سره پټه کړي.»
کابلوف زیاته کړې « موږ تر دې وړاندې هم د نیویارک ټایمز د درواغجن راپور په اړه تبصره کړې وه، دا ښه نه ده، چې د یوه بې اساسه راپور لپاره غوغا جوړه کړي.»
د نوموړي له قوله، په هغه راپور خبره کول، د شرم ځای دی، چې حتی د امریکا ولسمشر هم رد کړی.
یاده دې وي، چې څو ورځې وړاندې امریکایي رسنۍ «نیویارک ټایمز» د یوراپور په خپرولو سره ادعا وکړه، چې روسیې د امریکايي عسکرو د وژلو په بدل کې طالبانو ته نقدي جایزې منلې او ددې موضوع په اړه د امریکا ولسمشر ته هم خبر ورکړل شوی و.
د امریکا ولسمشر «ټرمپ» بیا د نیویارک ټایمز راپور بې اساسه او د نوم ورکو سرچینو له قوله جوړ شوی وباله او یاده یې کړه، چې پر عسکرو یې په افغانستان کې ډېر بریدونه نه دي شوي.
طالبانو هم یاد راپور د سولې د ملاتړو اذهانونو د مغشوشولو هڅه یاده کړه او ټینګار یې وکړ، چې د هیڅ هیواد د استخباراتو د احسان پوروړي نه دي او د هدف په تشخیص کې د چا مرستې ته اړتیا نه لري.
