په لوګر کې او هلمند کې حکومتي ځواکونو ته درانه تلفات اوښتي

نن ټکی آسیا: د ملي دفاع وزارت له لورې په خپره شوې خبرپاڼه کې ویل شوي، چې د تېرو ۲۴ ساعتونو په ترڅ کې د هېواد په ګڼو ولایتونو کې د ملي اردو لس عسکر وژل شوي.
د خبرپاڼې له مخې د ملي اردو ځواکونو په بدخشان، کندهار، لوګر ، هلمند ،هرات او خوست ولایتونو کې د طالبانو پر ضد عملیات ترسره کړي او په پایله کې یې هغوی ته د تلفاتو اړولو ترڅنګ لس عسکر له لاسه ورکړي.
بل پلو، باختر اطلاعاتي اژانس د لوګر د سیمه یېزو امنیتي چارواکو له خولې خبر ورکوي، چې نن سهار د دغه ولایت په ازره ولسوالۍ کې د طالبانو او حکومتي عسکرو ترمنځ خونړۍ نښته را منځته شوې.
د لوګر د امنیه قوماندان عبدالحکیم اسحاقزی ویلي، چې د دې نښتې په پایله کې د ملي اردو یو عسکر او اوه پولیس وژل شوي دي.
طالبانو حکومتي لوري ته د اوښتو تلفاتو پخلی کړی.
همدارنګه د طالبانو ویاند قاري یوسف احمدي وايي، چې د هلمند په مرکز لښکرګاه ښار کې د دوی دوو تنو نفوذي کسانو نن سهار وختې د پولیسو په یوه پوسته کې لاس په لاس جګړه کړې.
د ښاغلي احمدي په وینا ، په دې جګړه کې د پوستې د قوماندان «کوکي» په ګډون ۵ پولیس ځای پر ځای وژل شوي.
ویل کېږي، چې د طالبانو یاد نفوذي بریدګر له نښتې وروسته له یوه شمېر مهماتو سره روغ رمټ خپلو مرکزونو ته ستانه شوي.
د طالبانو ویاند وايي، چې په د دوی دغه ملګري له نیول شوي موټرسایکل،یوه ثقیل او کلاشنکوف سره تر دوی پورې ځانونه رسولي دي.