طالبان: زمونږ سیاسي او نظامي دریځ متحد دی
نن ټکی اسیا (سه شنبه، ۲۴ چنګاښ، ۱۳۹۹ل): طالبانو د واشنګټن پوسټ وروستي راپور په غبرګون کې ویلي، چې سیاسي او نظاني دریځ یې متحد او د واحدې تګلارې پیروان دي.
تیره ورځ امریکايي ورځپاڼې واشنګټن پوسټ د یو راپور په خپرولو سره ادعا کړې وه، چې ګواکې د طالبانو د سیاسي او نظامي مسئولینو ترمنځ همغږي شتون نه لري، ځکه په خبره یې نظامي طالبان د جګړې له لارې د واک ترلاسه کولو باندې ډاډمن دي؛ خو طالبانو بیا دغه ادعاوې ناسمې او «مغرضانه» بللي دي.
د طالبانو ویاند ذبیح الله مجاهد په خپل ټویټر پاڼې د غبرګون ښکاره کولو پروخت لیکلي، چې طالبان یو موټی او د واحدې رهبرۍ لاندې متحده تګلاره تعقیبوي:
#غبرګون:
د مجاهدینو ترمنځ د تضاد په اړه د واشنګټن پوسټ راپور مغرضانه او د سولې پرخلاف د موقف نیولو په معنا ده.
د اسلامي امارت مجاهدین واحده رهبري، واحد دريځ او واحده برنامه لري.
نظامي مجاهدین په نظامي ډګر کې او سیاسي مسئولین په سیاسي برخه کې خپل خپل مکلفیتونه پرمخ وړي.— Zabihullah (..ذبـــــیح الله م ) (@Zabehulah_M33) July 14, 2020
د شنونکو په باور په امریکا کې یو شمېر هغه کړۍ چې د افغان جګړې په غځولو کې خپلې ګټې لټوي، غواړي دداسې راپورونو په ورکولو سره د افغان سولې پروسه له خنډونو سره مخ کړي او د سبوتاژ هڅې یې کوي.
شنونکي د طالبانو په شمول له ټولو اړوندو جهتونو څخه غواړي چې هرڅومره ژر کیدای شي د بین الافغاني مذاکراتو لپاره زمینه برابره او مذاکرات پیل کړي، ترڅو د سولې مخالفینو ته د «تخریب» موکه په لاس ور نه شي.
