د خپل وخت له قاتلینو سره اشنا شئ

ژباړه: عطا محمد میاخېل

که تاسو هم د هغو کسانو برخه یاست، چې ناڅاپه په دې باندې پوهېږﺉ او وینئ، پرته له دې چې کوم کار مو کړی وي، خپل وخت مو له لاسه ورکړی دی، باید د هغو لاملونو په لټه کې شئ، چې د ډېرو ساعتونو لپاره تاسو بوختوي او وروسته له دې، د خپل وخت د بېځایه تېرېدو په خاطر مو تاسو ته د اندښېنې او خواشینۍ احساس در کوي، بده نه ده، چې لاندې تور لېست ته وګورﺉ او ښایي د وخت قاتلین مو پکې شتون ولري:

بې تصمیمي:
ډېری کسان دا چې له خوبه را ویښ شي، په دې باندې پوهېږي، چې د نن لپاره څه کارونه لري، خو ډېری کسان د خپلو کارونو د لومړیتوب بندۍ لپاره مشخص پروګرام نه لري او همدا بې پروګرامي د دې سبب ګرځي، چې له یوه خاښ څخه بل خاښ ته والوځي، په دې وضعیت کې ترڅو چې پوهېږﺉ، ورځ مو پای ته رسېدلې ده.

په انټرنېټ کې ښکته او پورته ګرځېدل:
ټاکل شوې وه، چې انټرنېټ د وخت په سپما او د لګښتونو په را کمولو کې یوه وسیله شي، خو کله وخت ټولنیزو شبکو ته سر ورښکاره کول مو ټول وخت بېځایه تېروي. ښایي تاسو هم ورسره مخامخ شوي وﺉ، چې د یوې ځانګړې موضوع په اړه د څېړنې لپاره، دومره له یوې پاڼې څخه بلې پاڼې ته تللي یاست، چې اصلي موضوع مو هېره شوې ده.

موبایلي او کمپیوټري ګېمونه:
بېلابېل کمپیوټري ګېمونه د وخت په تېرېدو کې داسې مهارت لري، چې د څو ساعتونو له ګېم وهلو څخه وروسته نه د ستړیا احساس کوﺉ او نه هم د وخت تېرېدو ته متوجه کېږﺉ، نن ګرځنده ټیلیفونونه هم د ګېم لپاره کافي امکانات لري، ترڅو ناڅاپه، په کارځای، پوهنتون او یا بل هرځای کې، چې ومو غوښتل لږ ګېم ووهﺉ، تاسو په لومه کې را ګیر کړي او ګټور وخت مو بېځایه تېر کړي.

له دوستانو سره خبرې کول:
کله وخت ټیلیفوني خبرې او کله وخت ناڅاپي لیدنې د دې سبب ګرځي، چې ټول وخت مو په خبرو کولو تېر شي، چې هېڅ ګټه هم نه لري.

تاسو ته وړاندیز نه کېږي، چې موبایل مو بند کړﺉ یا کله چې خپل دوست مو ولیده، نو مخ ترې وګرځوﺉ، بلکې سپارښتنه کېږي، چې د خپلو خبرو اترو مدیریت ته ښه والی ور وبښوﺉ.