له افغانستانه د سیکانو یوه بله ډله هم هندوستان ته روانیږي

نن ټکی اسیا سه شنبه، ۲۱ زمري، ۱۳۹۹ل): ټاکل شوې ده، چې سبا د چهارشنبې په ورځ له افغانستانه د سیکانو او هندوانو یوه بله ډله هم د هندوستان په لور حرکت وکړي.

د «ټایمز آف انډیا» هندي رسنۍ په خپل تازه راپور کې د افغان یو چارواکي په حواله لیکلي، شاوخوا ۱۸۰ هندو او سیک مذهبه لږکي په افغانستان کې د نا امنۍ او مذهبي توپيري چلن له امله اړ شوي چې افغانستان خوشې کړي.

باید وویل شي چې تردې وړاندې هم یوه هندوان او سیکان له افغانستان څخه هندوستان ته کډه شوي وو، چې هلته د هندوستان لومړي وزیر نریندرا مودي لخوا یې تود هرکلی شوی ؤ.

له افغانستانه د هندو او سیک لږګیو د تېښتې لړۍ وروسته له هغه چټکه شوه، چې څو میاشتې وړاندې په کابل کې د سیکانو په یوه مندر خونړي برید کې شاوخوا ۲۵ تنه مړه او لسګونه نور ژوبل شول.

د یو اټکل له مخې دا مهال افغانستان کې شاوخوا ۷۰۰ تنه هندوان او سیکان ژوند کوي، شنونکي په دې باور دي که حالات همداسې روان وي، ښايي ډیر ژر پاتې هندوان او سیکان هم له افغانستانه تېښتې ته اړویستل شي.