شعـــــرونه

اې د وخت حاکمه! څۀ دهشت و چې ونۀ شو/ جانان خدرخېل

جانان خدرخېل

اې د وخت حاکمه! څۀ دهشت و چې ونۀ شو
ستا په باچاهۍ کې کوم وحشت و چې ونۀ شو

څومره قیامتونه چې ستا لاس کې و ټول راغلل
یو ستا له وس پورته قِیامت و چې ونۀ شو

لور جګړه دې پېغله او لا ځوانه په مستۍ شوه
زوی دې خوار ولس ته امنیت و چې ونۀ شو

تور پنجاب دې زړۀ درته اره کړ او تۀ مات شوې
دلته خو په کار استقامت و چې ونۀ شو

څومره نفرتونه دې زموږ تر منځه راوړل
موږ ته ضرورت د محبت و چې ونۀ شو

سوله کې له چانه اجازې ته څۀ اړتیا ده؟
دې کار کې به څنګه مصلحت و چې ونۀ شو

هر څۀ درنه وشول، درنه شوي، درنه کېږي
یو چې باید شوی وای، غیرت و چې ونۀ شو

لس ځایه دې سلو دښمنانو باندې خرڅ کړو
کوم یو تجارت او کوم سیاست و چې ونۀ شو

راوړه “خدرخېل” د زولنو کیسه کې نۀ دی
هسې هم ژوندون د حریت و چې ونۀ شو

ـــــــــــــــــــــــــــ

۱۳۹۹/۵/۲۷

 

ورته لیکنې

ګډون وکړئ
خبرتیا غوښتل د
guest

0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx