د اسلامي نظام په اړه درې ډوله افکار!

اسامه جوهری

په معاصره نړۍ کې د مفکرينو ترمنځ تر ټولو ستر بحثونه په نظامونو باندې کېږي ، نظام هغه اجباري څيز وي چې انسان يې پخپله په ځان باندې تطبيق کوي او منلو ته يې چمتو وي ، همدا راز اسلام هم يو نظام لري ، خو په معاصره نړۍ کې درې مفکورو والا خلک د اسلامي نظام په اړه ليدلی شو ،

۱: هغه خلک دي چې اسلامي نظام د وګړو په کړنو قياس کوي ، او دا نيوکه کوي چې ګوره ! فلانکۍ ډلې اسلامي نظام جوړ کړی وو او څنګه څنګه اعمال به يې کول ، زما په فکر دا قسم دليل والا تر ټولو کم فهمه او احساساتيان دي ، لامل دا دی چې دوئ د يو څو وګړو په ناسمو کړنو د اسلامي نظام څخه انکار کوي ، دوئ د اسلام مطالعه کولو زحمت نه کوي بلکه يوه عقده يې اخيستي وي ، مثال : څو مياشتې مخکې په امريکا کې يو پوليس راولاړ شو او يو تور پوسته يې وژولو ، نو آيا د دې دا معنا شوه چې د نظام په اصل کې د تور پوستو ناحقه وژل راغلي ؟ هيڅ کله هم يو اکادميک انسان په دې طريقه په يو نظام رد نشي کولی ، بلکې رد لپاره لازمه ده چې په قوانينو کې نواقص راويستل شي .

۲:دويم هغه سيکولر خلک دي چې دوئ وايې اسلامي نظام زوړ شوی بايد نوې نړۍ سره د مقايسې لپاره د نوې نړۍ نظامونه تطبيق کړل شي ، متأسفانه د همدې فکر په سلسله کې بعض ( متجددين ) هم پيدا شول ، او زيات کوښښ يې په دې دی چې څنګه د اسلام او غرب تصادم لمنځه یوسي ، او پر ځائ همه شموله نظام راوړي ، خو زما په فکر دا دواړه ډوله خلک په غلط فهمي کې واقع دي ، لامل دا دی چې :
نظام کوم مادي څيز نه وي چې لمر به يې وهي او يا به زوړ شي بلکه نظام غير مادي څيز وي ، زوړ والی يا نوې والی نه لري بلکه ( صحي او غلط ) باندې تلل کېږي ، که چېرې يو نظام صحي وي نو هغه دې درې زره کاله پخوانی ولې نه وي خو بيا هم هغه د موجوده زمانې لپاره کارول کېدلی شي او که نظام د موجوده زمانې لپاره سم نه وي نو هغه رد کېدلی شي ، معاصر غربي فيلسوفان تر ډېره حده د يوناني فلسفو او سفسطو څخه کاپي کوي ، حال دا چې هغه د اسلام نه هم مخکې تېرې شوي ،
نکته : دا نکته ياد ساتل پکار دي چې غرب مجبوره وو چې زړې فلسفې او سفسطې راواخلي ، ځکه چې هغوئ سره هيڅ کوم سالم اجتماعي نظام نه وو ، د (فيوډل لارډ ) او د پاپايانو خواهشاتو د يو نظام بڼه غوره کړې وه ، دوئ په حقیقي معنا دې ته نه کتل چې زموږ قوانين ټولنه مثبت اړخ ته بوزي او که منفي اړخ ته ، بلکه دوئ دې ته کتل چې قوانين زموږ د خواهشاتو تکميل په سالمه توګه کولای شي او کنه ، نو ځکه په اروپا کې نوې مفکرين پيدا شول او د حاکمانو په خواهش پرستي يې نيوکې پيل کړې ، نو د اروپا عوامو همدي فيلسوفانو ته اوږه ورکړه ، او مجبوره شول چې نوي او زاړه ګډ وډ کړي او يو نظام تيار کړي ، که تاريخ وګورئ نو اکثره فيلسوفان د خپل وخت د حاکمې طبقې سره سخت وران ول ،
نو هغوئ د مجبوريت لامله نظامونه رامنځته کول ،
خو متأسفانه چې بعض (حاکمو ) مسلمانانو سره تيار حاکم او مثبته نتيجه ورکونکی نظام هم وو ، خو بيا يې هم غربي نظامونو ته پناه یوړه ، دا پناه وړل د مجبوري لامله نه بلکه د حماقت لامله وو ، دوئ په دې فکر وو چې غرب ته به پناه ويسو نو عصري به شو ، قوي به شو، خو متأسفانه په لاشعوري ډول باندې د غرب په دام کې ګير شول ، اسلامي نظام هم له لاسه ووت ، زمکې هم لاړې ، اقتصاد هم لاړ ، اتحاد هم لاړ ، علم هم لاړ ، رعب هم لاړ ،
عصريت رانغی هغه اصليت هم ورپسې په جوارئ کې لاړو ….!
لنډه دا چې نظامونه نوي او زاړه نه وي بلکه صحي او غلط وي ، او غرب چې پرمختګ کړی نو په مادياتو کې يې کړي په معنوياتو کې نه ، وس هم په دوئ کې او د دوئ په نظام کې دسې جهالتونه شته چې د کوم د اسلام نه مخکې وو او اسلام ختم کړي وو ،
موږ غربي نظامونو ته اړتيا نه لرو بلکه په مادياتو کې له غرب څخه زده کړې ته اړتيا لرو ، او له دې څخه مو اسلام نه منعه کوي بلکه تلقين هم راکوي ، يو وخت دا مادي علوم موږ سره وو ، هغوئ رانه يوړل ، وس هغوئ سره دي که موږ يې ترې راوړو نو د شرم خبره نه ده .

۳:دريم ډول هغه خلک دي چې دوئ اسلامي نظام غواړي ، خو متأسفانه په دې ډله کې ډېر لږ خلک دي چې په اسلامي نظام يې ځان پوهه کړی ، ډېر لږ خلک اسلامي نظام تشريح کولی شي ، او چې کوم خلک يې تشريح کولی شي هغوئ هم ډوکسو فوبيا (doxo phobia) کې اخته دي ( ډوکسو فوبيا دسې يو مرض دی چې په دې کې انسان د خپل زړه خبره کولو څخه ډارېږي يعنې د خپلې رايې اظهار نشي کولی ) ، وس که چېرې اسلامي نظام رازي هم نو بايد دا دريم ډول فکر والا زيات شي ، او په اسلام ځان پوهه کړي ، د هر مسلمان ذهن ته دا خبر ورسوي چې زموږ بقا په اسلامي نظام کې ده ، او د غرب په دې لاشعوره غلامي کې دسې خوړل کېږو لکه څنګه چې ( وينا په لرګي ) کې ولګيږي ،
هر کله چې يو نظام حاکم شي او تشريح نه شي نو هغه نظام بقاء نه مومي ، لکه مثال چنګيزيان د اسلام نه بعد راغلل په نيمه نړۍ حاکم شول خو وس يې هيڅ معلومات نه کېږي ، لامل دا وو چې هغوئ په زړونو او عقلونو کې ځاي نه وو پيدا کړی ،
همدا راز د تېرې پيړۍ اکثره مسلمانان د اسلامي نظام نه غافله شول ، خالي کوپړۍ ګرځېدل او د همدي خالي کوپړيو څخه غرب فايده واخيسته او د خيالي فلسفو څخه يې ډکې کړې ،
د دې لوئ مثال په اسلامي نړۍ کې ليدلی شو چې غرب غلامۍ ته تعريف بدل کړو ، او دغه تعريفات يې د اکثرو ذهن ته ورسول ، بيا به د يو مسلمان په ذهن کې د غرب غلامي عين آزادي او عصريت بلل کيده ،
نوي فيصده سيکولر مخلوقات د اسلام په اړه علم نه لري بلکه وچ او په عقده ولاړ مخالفت کوي ، که يې نه منئ نو تجربه وکړئ ، يو سيکولر راونيسئ او پوښتنه ترې وکړئ چې : ته په يو مسلمانه کورنۍ کې پيدا شوی يې ، ژوند دې په مسلمانه ټولنه کې کړی ، او بيا هم د اسلامي نظام مخالفت کوې ، آيا تا واقعي اسلامي نظام مطالعه کړی او غلطي دې پکې موندلې ؟ او که فقط له نورو سيکولرانو دې اوريدلي ؟ واضحه خبره ده چې د اسلامي نظام مخالفت يا جاهله شخص کولاي شي او يا عقديئ ،
لنډه دا چې غرب له خالي ذهنونو څخه فائده واخيسته .

وس موږ ( د اسلامي نظام غوښتونکو ) ته پکار دي که واقعا اسلامي نظام سره مينه لرو او په خلکو يې منل غواړو نو بايد د دې لپاره هر اړخیز کوښښ وکړو ، ځان پرې پوهه کړو او د نورو مسلمانانو کوپړيو ته يې ورسوو ، وس ايج اف ريزن(AGE Of REASON) دی ، نظامونه په زور راتللی شي خو په زور نشي چلېدلی ، بلکه نظامونه په قوي استدلال ، قوي نتائجو او منافعو ، او اصولو باندي ساتل کيږي ، ځکه چې د خلکو افکار له زور څخه بغاوت کولی شي ليکن د قوي منطق څخه يې نشي کولای …..!