شعـــــرونه

خدايه د وطن جلال دې کم نه شي/ خيرخوا

لطف الله خيرخوا

رزم و د خودۍ کمال دې کم نه شي
خدايه د وطن جلال دې کم نه شي

حُسن دې له هرې څېړۍ وڅاڅي
ستا د خد وخال جمال دې کم نه شي

لمنځې دې په ملا تاوې راتاوې شه
دا د تورو زلفو ټال دې کم نه شي

تور ټکی پر سپين اننګي؛ خدايه نو
نور د حبشي بلال دې کم نه شي

غاړه د ناګار د غزل هسکه شه
څلی د حمزه د خيال دې کم نه شي

جوړ دې که قيامت د نښترو قامت
زړه! د عاشقۍ جنجال دې کم نه شي

ډلې د يرغه لېوانو ماتې شه
تاب د غرڅني غزال دې کم نه شي

تپ د يرغلونو دی غازي اشنا
ستا د څڼو يخ شمال دې کم نه شي

زړه به دې ژوندی په حماسو ساتې
ګوره چې خيرخوا مورال دې کم نه شي!

 

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x