کندز: د دولتي عسکرو هاوان برید کې ۱۱ ملکي وګړو ته مرګ ژوبله اوښتې

نن ټکی اسیا (سه شنبه، ۲۲ تله، ۱۳۹۹ل): په کندز ولايت کې د ملکي وګړو په کورونو د دولتي عسکرو له لوري توغول شوي توغندي لګېدلي چې له امله يې ۱۱ تنو ملکي وګرو ته مرګ ژوبله اوښتې ده.

راپورونه وايي چې دغه پېښه تېره ورځ د کندز ولايت مرکز شورابي قشلاق سيمه کې رامنځته شوې ده.

په دغه بريد کې د ښځو او ماشومانو په ګډون ۷ تنه ملکي وګړي وژل شوي او څلور نور ټپيان دي.

له سيمې څخه د ترلاسه شويو معلوماتو په اساس په دغه بريد کې يو جومات هم نړېدلی دی.

تر اوسه د کندز ولايتي چارواکو په دې اړه څه نه دي ويلي.

بايد وويل شي چې د دولتي عسکرو  له لوري وخت ناوخت د ملکي وګړو په کورونو د هاوان بريدونه کيږي چې له امله يې ملکي وګړو ته مرګ ژوبله اوړي.