ارزګان کې ۲۷ دولتي عسکر طالبانو ته تسلیم شوي
نن ټکی اسیا (سه شنبه، ۱۳ لړم، ۱۳۹۹ل): طالبانو ته د تسلیمېدونکو دولتي عسکرو په سلسله کې تیره ورځ ۲۷ تنه دولتي عسکر او پولیس طالبانو ته تسلیم شوي دي.
د طالبانو په رسمي ویب پاڼه الاماره ویب پاڼه د خپاره شوي خبر له مخې دغه ډله تسلیم شوي دولتي عسکر او پولیس د ارزګان ولایت دهراود ولسوالۍ مربوط دي، چې د طالبانو د دعوت او ارشاد کمیسیون سیمه ییزو مسئولینو لخوا ورته هرکلی ویل شوی دی.
په داسې حال کې چې له افغانستان څخه د امریکايي عسکرو بشپړ وتلو ته څو میاشتې پاتې دی او په قطر کې د افغان جګړې د خاتمې لپاره بین الافغاني مذاکرات پیل شوي، طالبانو ته د دولتي عسکرو د تسلیمۍ سلسله چټکه شوې، چې نیږدې هره ورځ لسګونه دولتي عسکر او پولیس طالبانو ته تسلیمیږي؛ خو دا په تیره یوه اونۍ کې تر ټولو زیات شمېر مسلح دولتي عسکر دي چې طالبانو ته د تسلیمۍ خبر یې ورکړل شوی دی.
د روان کال فبروري میاشتې په ۲۹ د طالبانو او امریکا متحدو ایالتونو ترمنځ د سولې توافقنامې له لاسلیک او دولتي منسوبینو ته د طالبانو د مشر شیخ هبة الله اخندازده لخوا د عامې بښنې له اعلان وروسته په زیات شمېر کې دولتي عسکر او پولیس طالبانو ته تسلیمیږي، تیره میاشت هم شاوخوا ۱۲۰۰ دولتي عسکر او منسوبین طالبانو ته تسلیم شوي وو.
