افغانستانسولې اړوند خبرونه

فارن پالیسي:د بایډن په ولسمشرۍ کې هم خلیلزاد خپل ماموریت مخته وړي

نن ټکی اسیا ( پنجشنبه، ۲۹ لړم، ۱۳۹۹ل): داسې مهال چې د امریکا ولسمشریزې ټاکنې د ډیموکراټانو نوماند «جوبايډن» ګټلې او د نوي کال له پیلېدو سره سم له پخواني ولسمشر «ډونالډ ټرمپ» څخه واک انتقالېږي؛ امریکايي رسنۍ وایي، د بایډن په راتګ که څه هم ښایي له ډېرو برخو څخه د ټرمپ له لوري ټاکل شوي کسان لیري شي؛ خو شونې ده زلمی خلیلزاد بیا هم په خپل ځای پاتې شي او د افغانستان د سولې پروسه وړاندې یوسي.

له امریکا څخه خپرېدونکې ورځپاڼې «فارن پالیسي» د امریکا نوي ولسمشر ته د نږدې سرچینو له قوله لیکلي، چې د بایډن په ټیم کې د خلیلزاد په اړه زیاتره نظرونه مثبت دي او داسې انګېرل کېږي، چې بایډن به نوموړي ته د وړاندې تګ اجازه ورکړي.

ورځپاڼې د اوباما او بایډن د دورې د یوه چارواکي له قوله لیکلي، چې که په راتلونکو څو میاشتو کې د افغان سولې په پروسه کې پرمختګ رامنځته شي؛ بایډن به خلیلزاد ته اجازه ورکړي چې خپل ماموریت مخته یوسي.

له چارو څخه د باخبر یوه بل چارواکي په وینا، د بایډن په ټیم کې د خلیلزاد پر ځای د ساتلو «منطق» د نوموړي د لیري کولو تر غږ زورور دی او د بایډن د بهرنۍ پالیسي ملګري تر ډېره د زلمي خلیلزاد د پاتې کېدو پلوي دي.

دده په خبره، له هر چا سره چې غږېدلی دا یې ترې حس کړې چې د خلیلزاد د لیري کولو په اړه د بایډن په ټیم کې ډېر ټینګار نشته؛ نو «دی پرېږدئ چې خپل پيل کړی کار پای ته ورسوي.»

افغانی الاصله امریکایی «زلمی خلیلزاد» چې په کابل کې لوی شوی او د کابل حکومت د اوسني مشر «اشرف غني» ټولګیوال پاتې شوی؛ نږدې درې کلونه کېږي چې د افغانستان لپاره د امریکا د ځانګړي استازي په حیث ټاکل شوی او له طالبانو سره د مذاکره کوونکي امریکایي ټيم مشري ور له غاړې شوې.

حکومت له طالبانو سره د امریکا د مذاکراتو له پیله تر دې دمه د نوموړي له پرېکړو ناخوښ ښکاري او هغه تورنوي چې د حکومت د بهرنۍ پالیسي واګې يې په لاس کې اخیستي او له طالبانو سره د مذاکراتو په مهال یې حکومت په حاشیه کې ساتلی.

په امریکا کې د ولسمشریزو ټاکنو په ترڅ کې د بایډن تر ټاکل کېدو وروسته حکومت تمه درلوده، چې د ټرمپ له لوري ټاکل شوی خلیلزاد به له دندې لیري شي او بایډن به د افغان سولې په پروسه له سره غور وکړي؛ خو امریکا کې حالات بیا داسې دي چې د حکومت هیلې مړاوې کوي.

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x