طالبان: د دهراود دارالمعلمین به بیرته رغوو او «چپاولګر» به نیسو

نن ټکی اسیا (پنجشنبه، ۶ لیندۍ، ۱۳۹۹ل): طالبانو د ارزګان ولایت په دهراود ولسوالۍ کې د دارالمعلمین له ودانۍ څخه د «چور» او «تالان» په تور یو شمېر کسان نیولي او له نورو کسانو یې «غلا» شوو مالونو د بیرته ترلاسه کولو هڅې پیل کړې دي.

د طالبانو د فرهنګي چارو مرستیال احمدالله وثیق په خپلې ټویټر پاڼې ددې پېښې د غندلو ترڅنګ لیکلي، چې په همدې تړاو یې د ارزګان لپاره د طالبانو له مرستیال والي سره خبرې کړي دي.

۱/۲
په دهراود ولسوالي کې د دارالمعلمین د ودانۍ د وسایلو چور د زغملو نه دی،پېښه د اندیښنې وړ ده.
په همدې اړوند مو نن د ارزګان ولایت له مرستیال مزمل صاحب سره خبرې وکړې، هغوی پر پيښه خواشیني وښوده او ویې ویل، پيښه هغه وخت رامنځ ته شوې چې مجاهدین په دغه ساحه کې موجود نه وو، د بازر..

— Ahmadullah Wasiq (@AhmadullahWasiq) November 26, 2020

نوموړی زیاتوي، د ارزګان مرستیال والي «ملا مزمل» په دې پېښې  د خواشینۍ څرګندولو ترڅنګ ویلي، چې دا پېښه داسې مهال رامنځ ته شوې چې د د هراود ولسوالۍ د بازار دامنیت ساتلو چارې یو شمېر قومي مشرانو ته سپارل شوې وې او طالبان د «تښتېدلو» دولتي عسکرو په تعقیب پسې وتلي وو.

د وثیق په خبره چې د پېښې په تړاو طالبانو یو شمېر کسان نیولي او هڅه کوي چې د خلکو لخوا «غلا» شوي وسایل بیرته راټول او دارالمعلمین بیا ورغوي.

دا په داسې حال کې ده چې په دې وروستیو کې یو ویډیو کلیپ په ټولنیزو رسنیو کې لاس په لاس کیږي او لیدل کیږي چې د دهراود ولسوالۍ دارالمعلمین څخه عام خلک میزونه، څوکۍ او نور توکي غلا کوي.

په ورته مهال په سویل لویدیځه حوزه کې د طالبانو د تعلیم او تربیې او عالي تحصیلاتو یو لوړ پوړي چارواکي هم په دغه پېښه خواشیني څرګنده کړې او د پېښې د هر اړخیزې څیړنې خبر یې ورکړی دی.

باید وویل شي چې طالبانو کابو یوه میاشت وړاندې د هلمند ولایت ګرشک ولسوالۍ کې د برېښنا د سب ستیشین څخه د غلا په تور یو شمېر کسان ونیول او غلا شوي وسایل یې ورڅخه بیرته ترلاسه کړل، چې په هلمند کې د وروستیو جګړو پرمهال یې له دغه ستیشن څخه غلا کړي وو.