د امریکا کانګرس افغانستان کې د عسکرو له شمېر کمولو سره مخالفت ښودلی

نن ټکی اسیا (شنبه، ۱۵ لیندۍ، ۱۳۹۹ل): داسې مهال چې د امریکا ولسمشر د نوي کال د لومړۍ میاشتې تر نیمایي پورې له افغانستانه د زرګونو عسکرو د ایستلو اعلان کړی؛ د امریکا کانګرس یې له دې کار سره مخالفت ښودلی او ټینګار یې کړی، چې افغانستان کې باید د امریکایي عسکرو شمېر له څلور زره راټيټ نکړل شي.

د طلوع نیوز د راپور په اساس، کانګرس د ۲۰۲۱ کال د ملي دفاعي جواز قانون کې د عسکرو د شمېر کمولو په برخه کې د امریکا د ولسمشر صلاحیتونه محدود کړي او د تصویب شوې لایحې په اساس د عسکرو کمولو پرېکړه باید د ولسمشر تر څنګ نورې ادارې هم تصویب کړي.

د یاد قانون په اساس، ټرمپ نشي کولای په افغانستان کې د خپلو عسکرو شمېر په بېړني ډول له څلور زره راټيټ کړي.

د امریکا د کانګرس تازه دفاعي لایحه داسې مهال تصویبېږي، چې د امریکا ولسمشر د راتلونکي کال د لومړۍ میاشتې تر نیمایي پورې له افغانستانه د زرګونو امریکایي عسکرو د ایستلو اعلان کړی او ټینګار یې کړی، چې افغانستان کې د عسکرو شمېر باید ۲۵۰۰ ته راټيټ شي.

ورته مهال د امریکا او طالبانو تر منځ د شوي تړون په اساس له افغانستانه د بهرنیو ځواکونو د وتلو لړۍ هم روانه ده او د راتلونکي کال تر می میاشتې پورې باید ټول بهرني عسکر له افغانستانه ووځي.

طالبانو په بیا، بیا ټینګار کړی، چې د دوحې هوکړه د امریکا او افغانستانه په ګټه ده او له مخې یې باید امریکا او ناټو خپل ټول عسکر له دې هیواده وباسي.