ادبي لیکني

افغان رسنیز او څېړنیز مرکز د شیخ حَمَد د ژباړې او تفاهم نړیواله جایزه تر لاسه کړه

افغان رسنيز او څېړنيز مرکز

په کابل کې افغان رسنیز او څېړنیز مرکز د شیخ حَمَد د ژباړې او تفاهم نړیواله جایزه تر لاسه کړه.

دغه جایزه د نړۍ په کچه د ژباړې او فرهنگونو د ودې او پرمختگ په موخه د (شیخ حَمَد) د جایزې بنسټ له لوري له عربي ژبې څخه او یا هم عربي ژبې ته د معیاري ژباړو او علمي خدمتونو په برخه کې ورکول کېږي.

دغه جایزه هر کال د نړۍ په کچه د ژباړې او علمي پرمختگ په برخه کې بېلابېلو بنسټونو ته ورکول کېږي چې سږ کال د یادې سیالۍ په شپږمه دوره کې له 42 هېوادونو څخه تر 300 زیاتو بنسټونو او شخصیتونو ځانونه دغه جایزې ته نوماند کړي وو.

د پښتو او عربي ژبو د ژباړو په برخه کې له افغانستان او پاکستان څخه بېلابېلو ژباړونکو او علمي ادارو خپل اثار ددې جایزې لپاره کاندید کړي وو  او له افغانستان څخه افغان رسنیز او څېړنیز مرکز پدې بریالی شو چې دا نړیواله جایزه ترلاسه کړي.

د افغان رسنیز او څېړنیز مرکز رییس ښاغلي عبد الجبار بهیر ددې مرکز او ترلاسه کړې جایزې په اړه وایې چې دغه مرکز په کابل کې فعالیت لري او تر دې دمه یې د عربي او پښتو ژبو تر منځ لس گونه کتابونه، علمی او ښوونیز اثار ژباړلي دي.

ښاغلی بهیر زیاتوي چې نوموړی مرکز پر دې سربېره د عربي نړۍ په کچه د مطبوعاتو په ډگر کې د یوه خپلواک افغان څېړنیز او مطبوعاتي مرکز په توگه منل شوی او پېژندل شوی بنسټ ګڼل کېږي، چې د هېواد د علمي، ښوونیز او ټولنیز وضعیت په تړاو يې په نړیوالو علمي او اکاډیمیکو کانفرانسونو کې د افغانستان استازولي کړې ده.

د یادونې ده چې د (شیخ حَمَد) د ژباړې او تفاهم نړیواله جایزه په 2015 کال کې د قطر د پخواني پاچا شیخ حَمَد په نوم رامنځ ته شوه، چې له عربي ژبې او یا عربي ژبې ته د ژباړل شوو علمي اثارو او تالیفونو د ستاینې او ویاړنې په برخه کې فعالیت لري او د دوو مېلیونو امریکايي ډالرو په ارزښت د نړۍ تر ټولو لوړه جایزه بلل کېږي.

د (شیخ حَمَد) د ژباړې نړیواله جاېزه د هر میلادي کال په پای کې په لاندې دریو برخو کې غوره شوو ژباړو ته ورکول کېږي:

لومړی: پر عربي او انگليسي سربېره د یوې بلې نړیوالې ژبې تر منځ ژباړې، چې د هرې ژبې لپاره دوه سوه زره امریکايي ډالر ځانگړي شوي دي. دوهم: د یادو غوره شوو دوو ژبو د ژباړو په برخه کې د پرمختگ او لاسته راوړونکو اشخاصو او ادارو لپاره، دوه سوه زره امریکایي ډالر د جایزې په توګه ټاکل شوي دي.دریم: په کلنۍ توگه د عربي او پنځو غوره شوو ژبو تر منځ د ژباړو او ژباړونکو ادارو لپاره، یو میلیون ډالر جایزه ورکول کېږي چې په روان 2020 کال کې د فارسي، کوریايي، هوساوي، سویډني، بنگالي ژبو تر څنگ پښتو ژبه هم دې جایزې ته غوره شوې وه.

د یادونې وړ ده چې په تېرو پنځو دورو کې د انگلیسي، ترکي، هسپانوي، فرانسوي،آلماني، چینايي، جاپاني او روسي ژبو ژباړې توانېدلې وې چې دا جایزه ترلاسه کړي.

 

ورته لیکنې

ګډون وکړئ
خبرتیا غوښتل د
guest

0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx