د بایډن د ملي امنیت شورا نوماند سلاکار: د طالبانو او امریکا تر منځ شوی تړون باید پلې شي

نن ټکی اسیا (دوشنبه، ۱۵ مرغومی، ۱۳۹۹ل): د امریکا د تازه ټاکل شوي ولسمشر «جوبایډن» د ملي امنیت شورا لپاره نومول شوی سلاکار د طالبانو او امریکا تر منځ شوی تړون د دواړو لورو مسئولیت بولي او ټینګار کوي، چې یاد تړون باید په عمل کې پلې شي.

جېک سولېوان د امریکا له تلویزوني شبکې «سي اېن اېن» سره په خپله تازه مرکه کې ویلي، چې د طالبانو او امریکا تر منځ په دوحه کې لاسلیک شوی تړون پر دواړو لورو مسئولیتونه وضع کوي او باید یاد تړون نه یوازې په الفاظو کې؛ بلکې په عمل کې هم پلې شي.

نوموړي وړاندې زیاته کړې «د طالبانو مسئولیت دادی چې له القاعده سره په قاطع ډول اړیکې غوڅې کړي، د جګړې د شدت درجه راټيته کړي او په ښه ډول له حکومت سره په مذاکراتو کې برخه واخلي. د طالبانو او افغان حکومت تر منځ معامله روانه ده چې تمه کېږي، غوره پایلې به ولري او افغانستان ته به سیاسي ثبات راوړي؛ تر څو موږ وکولای شو خپل هدف ته ورسېږو او افغانستان کې شخړه پای ته ورسېږي.»

د بایډن سلاکار ددې تر څنګ ټینګار کړی، چې د بایډن اداره به د افغانسان په اړه همدا پالیسي تعقیب کړي؛ خو په عین حال کې به ځان ډاډه کړي چې افغانستان به بیا ځلې د «ترهګرو» په ځاله نه بدلېږي.

دا لومړی ځل دی چې د بایډن له لوري د راتلونکې ادارې یوې مهمې برخې ته نومول شوی چارواکی د طالبانو او امریکا له تړون ملاتړ اعلانوي.

تر دې وړاندې داسې ګنګوسې وې، چې ښایي بایډن د افغانستان په اړه د امریکا پر پالیسۍ له سره غور وکړي.

د کابل حکومت چارواکو هم له بایډن غوښتي و، چې د افغانستان په تړاو د امریکا د پخوانۍ ادارې پر پالیسي بیا ځلې غور وکړي.

ورته مهال طالبان بیا په دې اند دي، چې دوی تړون د امریکا له نظام سره لاسلیک کړی او که هره ډله حکومت ته راځي، له دوی سره شوي تړون ته به ژمنه پاتې شي.