د سولې خبرو سره همهاله کابل حکومت د پسرلنیو عملیاتو لپاره د تیاري اعلان کړی

نن ټکی اسیا (شنبه، ۲۰ مرغومی، ۱۳۹۹ل): د سولې خبرو ته د افغانانو او نړیوالو د هیلو د زیاتېدو په درشل کې کابل حکومت د راتلونکو پسرلنیو عملیاتو لپاره د تیاري اعلان کړی دی.

په راتلونکي پسرلي کې د طالبانو پرضد د پراخو پوځي عملیاتو لپاره د کابل حکومت دفاع وزارت د څلورو قول اردوګانو قومندانان رد او بدل کړي دي.

دفاع وزارت وايي، د ۲۰۹ شاهین قول اردو قومندان جنرال هیبت الله علیزی د ځانګړو عملیاتو د قول اردو د قومندان جنرال فرید احمدي پرځای ټاکل شوی او ډګروال محمدعلي ددې قول د څلورمې لوا د قومندان په توګه ټاکل شوی دی.

ددې ترڅنګ جنرال مصطفی وردګ د ۲۰۹ شاهین قول  اردو د قومندان په ټوګه او جنرال عبدالجبار د ۲۰۱ سیلاب قول اردو د قومندان په توګه ټاکل شوي دي.

تیره میاشت جنرال سید سمیع سادات هم د ۲۱۵ میوند قول اردو او جنرال شفیق الله رسولزی د ۲۰۵ اتل قول اردو د قومندانانو په توګه ټاکل شوي وو.

ددفاع وزارت ویاند فواد امان وايي، د قول اردوګانو په رهبري او قومندانۍ کې پورته تغییرات د راتلونکو پسرلنیو عملیاتو د تیاریو لپاره  ترسره شوي او په خبره یې ددوی عسکر به کلکې دفاع ته چمتو وي.

د کابل حکومت ددفاع وزارت په داسې مهال د قول اردوګانو قومنداني او رهبرۍ کې د راتلونکي پسرلني جنګي موسم لپاره د تیاریو خبر ورکوي، چې ټاکل شوې ده نن د شنبې په ورځ قطر کې د بین الافغاني مذاکراتو ټیمونه د سولې خبرو په اصلي اجنډا خپلمنځي بحثونه پیل کړي.

د چارو شنونکي وايي، د بین الافغاني مذاکراتو دویم پړاو له پیلېدو او د خبرو اساسي موضوعاتو ته د مذاکراتي ټیمونو له ننوتلو سره همهاله د کابل حکومت لخوا د جګړې لپاره تیاری او په اړه پراخ  تبلیغات د سولې پروسې په وړاندې د اشرف غني «ژوره» دښمني څرګندوي.

د شنونکو په باور که نړیواله ټولنه او په کور دننه سیاسي جریانونه د سولې پر وړاندې د اشرف غني د «خپلسرو» مخه ډب نه کړي، ښايي د نوموړي «جګړه خوښي» اقدامات د بین الافغاني مذاکراتو پروسه ستونزمنه او اوږده کړي، چې له امله به یې هېواد کې جګړه سخته او د جګړې بیه به افغان ځوانان پرېکوي.