د دولتي عسکرو لخوا د ۱۸ ملکیانو د «شهادت» پېښه په پراخه کچه وغندل شوه

نن ټکی اسیا (دوشنبه، ۲۲ مرغومی، ۱۳۹۹ل): د نیمروز ولایت په خاشرود ولسوالۍ کې د دولتي الوتکو په هوايي برید کې د یوې کورنۍ د اتلس غړو د شهادت پېښه په پراخه وغندل شوه او دا یو بشري جنایت وبلل شو.

د طالبانو ترڅنګ پخواني ولسمشر حامد کرزي، د کرکټ بورډ پخواني مشر او پاکستاني کې د افغانستان پخواني سفیر عاطف مشعل په ګډون ګڼو افغان سیاسیونو او مشرانو دغه پېښه غندلې ده.

پخواني ولسمشر حامد کرزي د یوې اعلامیې په خپرولو سره دا پېښه په کلکو ټکو غندلې او بشري جنایت یې بللی دی.

«د افغانستان پخوانی جمهور رئیس حامد کرزی د نیمروز ولایت په خاشرود ولسوالي کې هوایي بمباري چې له امله یې د ښځو او ماشومانو په گډون زموږ گڼ شمېر هېوادوال شهیدان او ټپیان شوي په کلکو ټکو غندي او دغه ظالمانه عمل د ټولو انساني او اسلامي اصولو او ارزښتونو خلاف بولي .»

ددې ترڅنګ د افغانستان د کرکټ بورډ پخواني مشر او پاکستان کې د افغانستان پخواني سفیر شکرالله عاطف مشعل هم دغه پېښه غندلې، نوموړي په یو ټویټ کې داسې ویلی: «نیمروز کې په ولسي خلکو داسې ناځوانه او بې رحمه برید د غندلو ده، هیڅوک حق نلري بیګناه افغانان ووژني. شهیدانو ته برین جنت او دوستانو ته یې د زړه صبر غواړو.»

که څه هم د نیمروز سیمه ییز چارواکي په دغه برید کې ټول وژل شوي کسان طالبان بولي؛ خو د ولایتي شورا وکیلان وايي، چې په دغه برید کې «شهیدان» وګړي ټول ملکیان دي.