افغانستان

قریشي د «سرحدي بازارونو» جوړېدو په اړه له اتمر سره غږېدلی

نن ټکی اسیا (سه شنبه، ۷ سلواغه، ۱۳۹۹ل): د پاکستان د بهرنیو چارو وزیر «شاه محمود قریشي» وایي، د کابل حکومت د بهرنیو چارو له وزیر «حنیف اتمر» سره یې تلیفوني خبرې کړې دي او د دوه اړخیزو اړیکو د غښتلتیا په موخه د جوړېدونکو سرحدي بازارونو په اړه ورسره غږېدلی.


قریشي پر ټویټر لیکلي، چې د عمران خان په هدایت له اتمر سره وغږېد او د سرحدي بازارونو او مارکېټونو د جوړېدو په اړه یې ورسره خبرې وکړې، چې دده په خبره، دا کار به د دوو اړخیزو سوداګریزو اړیکو په غښتلتیا کې مهم رول ولوبوي.


د قریشي له قوله، هیواد یې له افغان لوري سره په ګډه په افغانستان او سیمه کې د ثبات او سولې د تامین لپاره هڅې کوي.


حکومت که څه هم تر دې دمه ددې بازارونو په اړه چې د ډېورنډ کرښې په اوږدو کې جوړېږي، چوپه خوله دی؛ خو تیره میاشت د کابل حکومت د سوداګرۍ او صنعت د وزیر په مشرۍ اسلام اباد ته د افغان پلاوي د سفر پر مهال هم پاکستاني لوري د «سرحدي بازارونو» د جوړېدو موضوع مطرح کړې وه.


دغه بازارونه پر ډېورنډ کرښه د اغزن تار «چې حکومت یې له پاکستاني لوري سره په معامله تورنېږي» له لګولو سره جوخت جوړېږي.

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x