فاریاب کې د دولتي عسکرو په توپچي برید ۱۸ تنو ملکیانو ته مرګ ژوبله واووښتله/ انځورونه

نن ټکی اسیا (یکشنبه، ۱۲ سلواغه، ۱۳۹۹ل): د فاریاب ولایت المار ولسوالۍ په بازار د دولتي عسکرو توپچي ډزو کې د ماشومانو او بوډاګانو په ګډون ۱۸ تنه ولسي خلک مړه او ژوبل شوي دي.

که څه هم د فاریاب ولایت امنیه قومندانۍ ویاند عبدالکریم یورش دغه پېښه د طالبانو د هاوان برید له امله ګڼي؛ خو د پېښې عیني شاهدانو او ټپیانو بیا رسنیو ته ویلي، چې دغه برید د دولتي عسکرو لخوا د ډي سي توپ په واسطه ترسره شوی دی.

د نظام الدین په نوم د پېښې یو ټپي پژواک ته داسې ویلي: «مونږ څلور تنه په یو دوکان  کې ناست وو، چې د خواجه عثمان له بیز څخه د ډي سي توپ یوه ګولۍ را وتوغول شوه او په دغه دوکان ولګېده، د کوم له امله چې مونږ ټول ټپيان شوو.»

د احمد جاوید په نوم د المار ولسوالۍ د کلینیک نرس او د ۱۳ کلن رامین په نوم د یو درملتون شاګر هم چې په دغه پېښه کې ټپیان شوي پژواک ته داسې ویلي: طالبان د المار ولسوالۍ بازار ته را ننوتل او له دولتي عسکرو سره په جګړه بوخت شول، دوی خپل درملتون ته پناه یووړه چې د ډي سي توپ یوه مرمۍ د درملتون مخې ته ولګېده او له لسو (۱۰) څخه زیات کسان یې ټپیان کړل.

له بل پلوه د میمنې د دولتي روغتون ډاکټر غلام سخي حلیم بیا وايي، د المار ولسوالۍ له نننۍ پېښې څخه ددې روغتون عاجلې څانګې ته ۷ تنه ټپیان ور وړل شوي، چې یو تن یې وفات شوی او ۶ تنه نور په سخت حالت کې تر عملیاتو لاندې دي.

په هغو انځورونو کې چې نن ټکي اسیا ته رسیدلي، ښکاري چې د المار ولسوالۍ بازار کې لویه ویجاړي رامنځته شوې او یو جسد په داسې حال کې لیدل کیږي چې په بشپړه توګه سوځېدلی دی.

له سیمې څخه وروستي راپورونه وايي، چې د المار ولسوالۍ په بازار د دولتي عسکرو له ډي سي توپ ویشتلو څخه لږ تر لږه دوه تنه ملکي هېوادوال شهیدان شوي او ۱۶ تنه نور ټپیان دي، چې د ټپیانو له جملې څخه د ۶ تنو حالت نازک ښودل شوی دی.

طالبانو هم دغه پېښه غندلې او جنګي جنایت یې بللی دی.

باید وویل شي چې په دې وروستیو کې د دولتي عسکرو لخوا په ملکي خلکو او عامه ځایونو «ړندې» بمبارۍ او توپچي بریدونه زیات شوي، چې ورسره د ملکی تلفاتو کچه هم د بل هر وخت په پلته زیاته شوې ده.