افغانستانسولې اړوند خبرونه

روسیه: افغان سوله کې د هند رول مهم دی

نن ټکی اسیا (سه شنبه، ۱۷ وری، ۱۴۰۰ل): د روسیې د بهرنیو چارو وزیر «سرګي لاوروف» وایي، هند د افغان سولې په پروسه کې مهم رول لري‌ او باید په همدې برخه کې کېدونکو نړیوالو هڅو کې ور ګډ شي.

هندوستان ټایمز ورځپاڼې د لاوروف له قوله ویلي، چې هند په افغانستان کې د سولې او سیاسي جوړښت په تامین کې مهم رول لري‌ او یو مهم سیمه ییز لوبغاړی دی چې باید د افغان سولې په برخه کې کېدونکو نړیوالو هڅو کې دخیل شي.

نوموړي وړاندې زیاته کړې، چې هند که څه هم په مسکو کې د افغان سولې په تړاو جوړېدونکې «ټرویکا» ناستې غړی نه و؛ خو د «مسکو فارمټ» غړیتوب لري، کوم چې د افغانستان په ګاونډ کې مهم هیوادونه متحد ساتي.

لاوروف ددې تر څنګ د افغانستان په قضیه کې له نړیوالو سره د روسیې د مشورو له بیا ځلې پیلېدو خبر ورکړی او د سیمه ییزې اجماع جوړېدل یې اړین بللي.

روسیه داسې مهال هند د افغانستان د سولې پروسې هڅو کې ګډون ته رابولي، چې د طالبانو او امریکا تر منځ د لاسلیک شوي توافق په اساس له افغانستانه د بهرنیو ځواکونو د وتلو نېټه تر بل هر وخت را لنډه شوې، چې ورسره جوخت د پخلاینې لپاره کېدونکې هڅې هم چټکې شوې دي.

تمه ده روانه میلادي میاشت د ترکیې په استانبول ښار کې د ملګرو ملتونو تر سرپرستۍ لاندې د افغان سولې په تړاو ناسته راوبلل شي، چې د حکومت او طالب استازو تر څنګ به د هند او روسیې په ګډون د سیمې یو شمېر هیوادونه هم برخه پکې ولري.

ورته لیکنې

ګډون وکړئ
خبرتیا غوښتل د
guest

0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx