نظامي کمیسون که بې تېکې توره!

ډاکټر احرار

الحمد لله موږ پخپل قیادت ویاړو تل یې د اسلام او خاورې د دفاع اړوند پریکنده پریکړې کړي چې له ورایه د بشپړ تفکر او درایت ښکارندویه وي، له شل کلنې جګړې وروسته چې زموږ ولس او طالب مشرانو نه هېرېدونکې قربانۍ ورکړي، په سیاسي ډګر کې یې هم کارنامې د یادولو وړ دي، د کفري نړۍ ټول اتهامات چې طالبان ترهګر دي، افراطیان دي، زورواکي دي، یوازې د جګړې په ژبه پوهیږي رد کړي او خپل سیاسي ځراکت یې وړاندې کړ، یو تاریخي تړون یې لاسلیک کړ، بیایې په تېر یو کال کې د تړون پوره ساتنه وکړه او د اسلام د حکم په اساس د کړې وعدې حفاظت یې وکړ، اشغالګر یې له مرګ، زخم او ډار نه وایستل او ولس ته یې امید ورکړ چې سولې ته رسیږو.

داچې اشغالګر دین او اصل نلري یاد تړون یې په څو مواردو کې نقض کړ او خپله زورواکي یې بیاهم وازمایله او اشغال پلوه رسنۍ یې ملاتړې وې، یوازې د طالب دفاعي عملیات یې یادول د ولس په ویر ورګډ نه و د اولس تلفات یې نه منعکس کول د صفر یک قطعات چې د بلیک واټر کرایه شوي ځواکونه دي؛ د خلګو په کورونو چاپې ولس وژنه او لوټ مار یې ګډ کړی و، د اسلامي امارت مشرتابه مجبورا نظامي کمیسون ته اجازه ورکړه تر څو هیرجن دښمن ته د سر په کاسه کې اوبه ورکړي دا یو نیک او پروخت اقدام دی او دا د افغان ولس ترجماني ده.

درې یاداشتونه یا پیشنهادونه لرم چې یو یې د سیاسي چارو او بل دوه له نظامي چارو پورې اړه لري،  نظامي کمیسون دې تندریز او ځنځیري عملیات پیل کړي، مثلاً په یوه وخت کې دې په متعددو ولایاتو او ولسوالیو کې عملیات پیل کړي؛ تر څو د دښمن او ګوډاګیانو څخه لاره ورکه شي، د دښمن ځواک دې په څو نقطو کې تقسیم کړي، که په کوم خاص ولایت یا ځای کې عملیات وي، دښمن یې د دفاع او رسد توان لري ولې که جګړه منتشره او شدیده شي دښمن په ډیرو ځایو کې مصروف شي د خپلو عسکرو اکمال او رسد ورڅخه پاتیږي نور یې عسکر مورال بایلي او طالبانو ته تسلیمیږي.

د طالبانو د روغتیایي چارو کمیسون دې د هیواد په داخل کې مستند جراحان راجلب کړي او د خپلو زخمیانو علاج ته دې زیات مراکز جوړ کړي تر څو یې ټيپانو ته په وخت رسيدګي وشي، تلف نشي او له يوې سيمې څخه بلې ته د وړلو اړتيا پېښ نشي، په دې سره به له يوې خوا د ټپيانو په وخت اداري شوي وي او له بلې خوا به طالبان د نورو له سياسي فشارونو څخه بچ وي.
په کابل، ننګرهار، کندهار او هرات کې ډاکټران شته دي چې د ناروغانو په تداوۍ او روغتيايي فعاليتونو کې پراخه او قوي مسلکي ونډه لري.

دریم زموږ ویاړلی سیاسي کمیسون او د قطر دفتر دې د مذاکراتو دروازې مؤقت وتړي او د فشار په توګه دې د استانبول غونډه تحریم کړي، په نه ګډون دې د نړیوالو او هم سرحده هیوادونو ډیموکراتیک اتحاد ور وشلوي او د بهرنیانو مکمل وتل، د ټولو بندیانو ازادیدل او د کابل ادارې مذاکراتي ټیم ته د پریکړو په صلاحیت ورکول دې مشروط کړي، که د کابل ادارې خپل مذاکراتي ټيم ته د پریکړو اختیارات ورکړي وای نن به د دوحې تړون له مخې بهرنیان وتل او یو بین الافغاني جوړښت به د غني متبادل جوړ وای.

افغانان د طالبانو ملګري دي او جدي اسلامي پریکړو ته په طمع دي، دښمن غواړي موږ مصروف کړي او د غني فاسد او مرګي حاله دولت ته د ګاونډیانو ملاتړ تر لاسه کړي.

د طالبانو شدید او ځنځیري عملیات او د مذاکراتو تحریم به دښمن بیرته خپلو کړیو ژمنو ته متوجې کړي او طالبان دې ټول جهادی مشران، مدني فعالان او سیاسیون له مختلفو لارو جلب کړي، اعتماد دې ورباندې وکړي، دوی دې هم متیقن کړي او د راتلونکي اسلامي امارت یا حکومت کې د اشتراک او ونډې وعده دې ورکړي، د بیان ازادي د یوې خپلواکې رسنۍ چې اسلام او افغاني فرهنګ ته درناوی ولري اطمینان دې ورکړي همداراز د ښځینو د کار او تعلیم مسئله هم باید د محمدي شریعت او زموږ درانه فرهنګ له مخې باید ولس ته ډاډ ورکړل شي او د هر راز موانعو خاتمه دې وشي تر څو د کابل اداره په خپله د کور دننه خنثا شي او د جمهوریت تابوت ناټویان له ځان سره یوسي.

د اشغال د خاتمې او سوکالۍ په هیله

ډاکټر احرار