د کندهار میوند او ارغستان ولسوالۍ د سقوط په حال کې دي

نن ټکی اسیا (دوشنبه، ۶ غوايي، ۱۴۰۰ل): د کندهار میوند او ارغستان ولسوالۍ د سقوط له ګواښ سره مخ دي او که هلته پروخت مرستندویه ځواک ونه لیږل شي، ښايي دغه دواړه ولسوالۍ سقوط وکړي.

ځايي سرچینې وايي، طالبانو له تیرو اتو ساعتونو راهیسې د میوند ولسوالۍ مرکز کلابند کړی او پر دفاعي پوستو یې بریدونه پیل کړي، چې له امله یې هلته میشت ځواکونه له سختې مایوسۍ سره مخ دي.

د سرچینو په خبره دا بریدونه نن مازدیګر مهال یوځل بیا هغه مهال شدید شول، چې طالبانو د میوند ولسوالۍ په مرکز له څو اړخونو څخه ډله ییز بریدونه پیل کړل، چې دا مهال د امنیه قومندانۍ په ودانۍ سخته جګړه روانه ده.

ویل کیږي چې د نن ورځې د نښتو پایله کې د میوند ولسوالۍ امنیه قومندان «حاجي لالا» هم د سر په برخه کې ټپي شوی؛ خو د روغتیايي وضعیت په اړه یې تردې دمه معلومات نشته.

له دې سره همهاله ځايي سرچینې وايي، چې طالبانو د ارغستان ولسوالۍ په مرکز هم له څو اړخونو څخه بریدونه پیل کړي او هلته میشت عسکر خبرداری ورکوي، که هوايي مرسته ورته ونه ورسیږي، ښايي ولسوالي سقوط وکړي.

د کندهار ولایت میوند او ارغستان ولسوالیو مسئولین په داسې مهال د یادو ولسوالیو د سقوط په اړه اندېښنې څرګندوي، چې تیره ورځ د میوند ولسوالۍ په «میراخور» سیمه کې د طالبانو پرضد د جګړې پرمهال د ژیړۍ ولسوالۍ امنیه قومندان عبدالبصیر اڅکزی ټپي او د صفر ۶ قطعې قومندان عبدالوارث همت اڅکزي په ګډون ۵ کمانډو عسکر ووژل شول.

دا په داسې حال کې ده چې روانه اونۍ بهرنیو ځواکونو د کندهار هوايي ډګر څخه د عسکرو ایستلو سره همهاله خپل ټول پوځي سامان الات وویستل او هلته یې خپل ټول قراردادونه فسخ کړل، د کومې له امله چې د دولتي عسکرو ترمنځ سخته وارخطايي او «ناهیلي» رامنځته شوې ده.

له ارګ څخه باخبره سرچینې وايي، چې روانه اونۍ کندهار ته د اشرف غني سفر هم ددې لپاره وو چې هلته میشتو عسکرو او دولتي چارواکو ته مورال ورکړي، ترڅو د بهرنیو ځواکونو له وتلو وروسته د طالبانو ممکنه بریدونو په وړاندې مقاومت وکړای شي.