ټولنیزه برخه

زرپارې – ۲۶ مه برخه

ليکوال: مولانا مفتي محمد تقي عثماني

ژباړه: احمد ګل ریان

د يو حديث له پاره يو کال:
علامه ابن عبدالبر رحمه الله په خپل سند له غالب قطان رحمه الله څخه يوه واقعه رانقل کړې ده، له دې واقعې پوهېدلی شو چې د حديثو د علم حاصلولو لپاره متقدمينو او سلفو څنګه تکليفونه پر ځان منلي او يو-يو حديث يې په څومره قدر او عزت حاصل کړی دی.

غالب قطان رحمه الله د پنبې تجار و، يو وخت د تجارت لپاره کوفې ته لاړ، دا سفر يې يوازې او يوازې تجارتي سفر و، خو کوفې ته په رسيدو يې فکر وکړ چې بايد د دې ځای د حديثو له علماء کرامو څخه استفاده وکړي. هغه وخت په کوفه کې مشهور محدث سليمان اعمش رحمه الله د حديثو درس ورکاوه. د اعمش رحمه الله په درس کې يې شرکت وکړ او ډير حديثونه يې زده کړل.

کله چې يې د تجارت کار خلاص شو او بصرې ته د تلو اراده يې وکړه، وروستۍ شپه يې د اعمش رحمه الله په خدمت کې تېره کړه. په دې شپه اعمش رحمه الله تهجد ته پورته شو او دا آيت کريمه يې په لمانځه کې ولوست.
شَهِدَ اللَّهُ أَنَّهُ لَا إِلَهَ إِلَّا هُوَ وَالْمَلَائِكَةُ وَأُولُو الْعِلْمِ قَائِمًا بِالْقِسْطِ (سورة آل عمران ۱۸)
اعمش رحمه الله له دې آيت سره څو نور کلمات هم وويل، چې د هغو په اوريدو غالب قطان رحمه الله پوه شو چې اعمش رحمه الله ته د دې آيت اړوند کوم حديث معلوم دی.

سهار د رخصتيدو په مهال يې له اعمش رحمه الله وپوښتل چې د شپې مو دا آيت بار بار تلاوت کاوه، په هکله يې کوم حديث درته رسېدلی دی؟
ما درسره ټول کال تير کړ، خو دا حديث مو نه دی راته ويلی.

اعمش رحمه الله ځواب ورکړ: والله لا احدثنّک به سنةً. (په خدای قسم چې يو بل بشپړ کال به هم دا حديث درته ونه وايم)

غالب قطان رحمه الله تجار سړی و او کوفې ته په تجارتي سفر تللی و. د کال په اوږدو کې يې هم چې څه علم زده کړی و، کم نه و. يوازې د يو حديث خبره وه او حديث هم د احکامو اړوند نه، بلکې د يو آيت د فضيلت اړوند حديث و، خو د ده شوق او ذوق ته فکر وکړئ. کله چې يې د اعمش رحمه الله ځواب واوريد، خپل سفر يې لغو کړ او له اعمش رحمه الله سره يې د يو بل کال تيرولو فيصله وکړه.

غالب قطان رحمه الله پخپله وايي: د امام اعمش رحمه الله په دروازه کې مې د هماغې ورځې تاريخ يادداشت کړ، کله چې پوره کال تير شو، ورته کړل مې: ابو محمد! کال تير شوی دی، اوس هغه حديث راته ووايه.

اعمش رحمه الله دا حديث راته درس کړ.
حدثنی أبو وائل عن عبدالله بن مسعود قال: قال رسول الله صلی الله عليه وسلم: يجاء بصاحبها يوم القيامة فيقول الله تعالی: عبدی عهد الیّ و أنا أحق من وفی بالعهد أدخلوا عبدی الجنّة.
ژباړه: ما ته ابو وائل له عبدالله بن مسعود رضی الله عنه څخه روايت کړی چې رسول الله صلی الله عليه وسلم فرمايلي: څوک چې د سورة آل عمران دغه آيت کريمه (شهدالله انه…) تلاوت کولو په سبب د قيامت په ورځ د الله تعالی په وړاندې ودرول شي، الله تعالی فرمايي: زما بنده له ما سره وعده کړې ده او زه په وعده باندې د وفا کولو تر ټولو زيات حقدار يم، زما بنده جنت ته داخل کړئ. (ابن عبدالر رحمه الله: جامع بيان العلم وفضله ج: ۱ ص: ۹۹، ادارة الطباعة المنيرية، مصر)

نور بيا که خدای کول

 

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x