افغانستان

ناټو: د بهرنیو پوځیانو تر وتلو وروسته له کابل حکومت سره د مرستو د دوام په اړه سلا مشورې کوو

نن ټکی اسیا (جمعه، ۱۷ غویی، ۱۴۰۰ل): داسې مهال چې له افغانستانه د امریکايي او ناټو ځواکونو د وتلو لړۍ روانه ده، د ناټو سازمان سرمنشي وایي، له افغانستانه د بهرنیو پوځیانو وتل له افغانستان سره د اړیکو غوڅولو په معنا نه دي او ناټو په دې اړه سلا مشورې کوي، چې څه ډول کولای شي، د خپلو پوځیانو تر ایستلو وروسته هم له حکومت سره مرستې روانې وساتي.

ینس سټولټنبرګ چې د اروپايي اتحاديې د دفاع وزیرانو په ناسته کې يې خبرې کولې وویل، چې په افغانستان کې د ناټو قاطع ماموریت پای ته رسېدونکی دی، خو دده له قوله، دا له افغانستان سره د اړیکو د ختمېدو په معنا نه دی.

نوموړي وړاندې زیاته کړې، چې د ناټو غړي هیوادونه په دې اړه چې څه ډول کولای شي، د خپلو پوځيانو تر ایستلو وروسته له کابل حکومت سره مرستې وکړي؛ سلا مشورې کوي.

د ناټو د سرمنشي پورتنۍ څرګندونې داسې مهال دي، چې له افغانستانه د بهرنیو ځواکونو ایستلو لړۍ روانه ده او تر دې دمه یې ګڼ شمېر نظامي مرکزونه تخلیه کړي دي.

ورته مهال د امریکا دفاع وزیر وايي، د امریکایي پوځيانو تر ایستلو وروسته هم د حکومتي عسکرو مرسته کوي او له هغوی سره د استخباراتي معلوماتو د شریکولو تر څنګ د لوژستیکي مرستو اراده هم لري.

د امریکایي پوځ لوی درستیز هم د پوځیانو تر ایستلو وروسته د مرستو په دوام ټینګار کوي او په خبره یې، په داسې یو پلان کار کوي چې په اساس یې حکومتي عسکر په بهرنیو هیوادونو کې وروزل شي.

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx
()
x