شعـــــرونه

پر اقصی لمبې بليږي/ حسان

حسان ضعیف

آه غازي صلاح الدينه چې پر تا به څه تېريږي
امت ټول په خوب وېده دي پر اقصیٰ لمبې بليږي

د یهودو بادشاهي ده فلسطین زره زره سو
سترګي پورته کړه جنابه ضرورت دي محسوسيږي

د نن عصر حاکمان یې ږغ نه اوري با کاڼه دي
یا ړانده یا غلامان دي چې هيڅ نه ورته ښکاریږي

ایوبي صلاح الدینه عمر تللي له دنیا دي
د کفري یرغل لاسونه مو کورو ته رارسيږي

دبدبه دي را ژوندی کړه بیا د فتحو څادر خپور کړي
فساد اوج ته رسېدلي دي قرآن ته تطبیق کیږي

ای مرحوم صلاح الدینه مدینه ده په خطر کي
پرې لاسپوڅي حاکمان دي چې په هیڅ لا نه خبريږي

یو ملنګ توره په لاس کي پورته سوي دی افسوس خو
له کفارو څخه مخکي مسلمان ورته دريږي

نن د واه معتصما چيغي د هري خور پر خوله دي
خو د مال او قدرت تږو غوږ ته کله وررسيږي

محمد ابن قاسم دي که طارق که غزنوي دي
سوي چيغي مو نه اوري یو لا نه راپورته کیږي

دوو جملو امت تبا کړ چې “اسلام د امن دين دي”
بل “پرده د مخو نه ده بس په زړه کي دي جوړیږي”

مسلمان دومره ذلیل شو چې د ځان اختیار یې نسته
یو د بل د وینو تږي ورور د ورور په لاس قتلیږي

نړي ټوله په یوه خوله ده مسلمان ته یوه سوې
په هرځای کي مسلمان په دهشتګر سره یاديږي

سرې لمبې دي سور انګار دی ړنګ د هر مسجد منار دي
مدرسه شهيده سوې پر قرآن لمبې بلیږي

چې اختر راسي بیا درومي داسي غلي غلي تېر سي
د حسان ضعيف په کلي کي بس ویني دی بهیږي

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx
()
x