شعـــــرونه

بختور اختر/ نومير

فدامحمد نومير

لويه خدايه بختور په موږ اختر کړې
را بهر مو د نفاق له سمندر کړې

دواړه لاسه مو اوچت په استدعا دي
کور، کهول څه مو نوم ورک د مرور کړي

څو لاسونه د ورورۍ يو بل ته ورکړو
بختور اختر په مونږه بختور کړې

فکر او هوش نه مو کينه او بغض و باسې
خيرن زړونه مو په نور را منور کړې

د ورورۍ مينه الفت راکې مينځو کې
اتحاد او اتفاق مو يو په زر کړې

د ولس د سوکالۍ فکر، خيال راکړې
په دې لار کې برکت په ښځه ، نر کړې

چې دا وران ويجاړ کورګی سره سنبال کړو
ابادۍ‌ ته د هيواد هر يو ناظر کړې

ځانځانۍ، خودپرستۍ نه مو وساته
په تقوا کې مو اوچت له قلندر کړې

د يتيم، کونډې ارمان چې کړي تر سره
تاج و تخت په هغه کس ته بختور کړې

توپ و ټانک په خپل قدرت ايرې، اوبه کړې
محوه نوم ته د کمزوري ، زورور کړې

چې سو سيال د سيالدارۍ په دې دنيا کې
د ګوربت په څير عطأ راته وزر کړې

ستا بې دره بل در نسته په ژړا يو
ستر څښتنه زما ولس باندې اختر کړې

متحده ايالات ، کلفورنيا ، ارواين

 

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx
()
x