روغتیا

سږکال به کرونا لا خطرناکه وي، «واکسین ماشومانو ته د لګولو پرځای غریبو هېوادونو ته ولیږئ»

نن ټکی اسیا (شنبه، ۲۵غویي، ۱۴۰۰ل): د روغتیا نړیوال سازمان اندېښنه لري چې سږکال به د کرونا ویروس د تېر هغه په پرتله لا خطرناک او وژونکی وي، په داسې حال کې چې ځینې هېوادونه عادي حالت او ځینې نور لا هم د کرونا په خټه کې نښتي دي.

د کرونا ویروس چې د ۲۰۱۹م کال په پای کې له چین څخه نړۍ ته خپور شو، تر دې دمه لږ تر لږه د ۳.۳ ملیونه (۳۳ لکه) کسانو د مړینې لامل شوی، چې د بدلونونو څرګندېدل او د واکسین ناکافي پرمختګ د لا اندېښنې لامل ګرځېدلی دی.

د روغتیا نړیوال سازمان عمومي رییس «تیدروس ادانوم ګیبریسوس» په یوه خبري کنفرانس کې وویل چې ډیری هېوادونه لا هم د ناروغۍ ریکارډ پېښې ثبتوي، په دې کې هند، نیپال، سریلانکا او ځینې امریکایي هېوادونه شامل دي، د نوموړي په وینا، لکه څرنګه چې دوی د کرونا حالت څاري، د ناروغۍ خپرېدو دوهم کال به د لومړي په پرتله ډیر وژونکی وي.

«زه پوهیږم چې ولې ځینې هېوادونه غواړي خپلو ماشومانو ته د کرونا واکسین ولګوي، مګر زه له دوی څخه غواړم چې ددې پرځای دې د کوواکس پروګرام سره د واکسینو ورکولو په اړه فکر وکړي». کوواکس د واکسینو نړیواله پروسه ده چې بېوزله هېوادونو ته د واکسینو رسولو لپاره رامنځته شوې ده.

تر دې دمه روغتیا پوهان لا هم ماشومانو ته د واکسین ورکولو په حق کې نه دي، ددوی په وینا ځینې واکسین پوهان ماشومانو ته واکسین له خطره پاک نه بولي، له همدې امله د روغتیا نړیوال سازمان له هغو هېوادونو چې له کرونا څخه د پاکوالي لپاره ماشومانو ته د واکسینو پروسه پېلوي غواړي، تر څو بېوزله هېوادونو ته واکسین ولیږي او د کرونا مخنیوی په بشپړ ډول ترسره شي.

تر دې دمه په ټوله نړۍ کې له ۱ ملیارد او ۴۳ ملیونو زیاتو کسانو ته لږ تر لږه د کرونا واکسینو یو دوز لګېدلی دی، چې له مخې یې په چین کې ۳۷۰ ملیونه او په امریکا کې دغه شمېره ۲۶۰ ملیونه دوزه واکسینو ته رسېدلې ده.

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx
()
x