اسدالله خالد: بهرنیان د پوځیانو تر ایستلو وروسته هم د کابل د عسکرو هوایي ملاتړ کوي

نن ټکی اسیا (دوشنبه، ۱۰ غبرګولي، ۱۴۰۰ل): د کابل حکومت دفاع وزیر «اسدالله خالد» ادعا لري، چې امریکایي او ناټو هیوادونه له افغانستانه د خپلو ځواکونو تر ایستلو وروسته هم د کابل حکومت له عسکرو هوایي ملاتړ ته دوام ورکوي.

خالد چې له څو میاشتنۍ درملنې وروسته تازه له امریکا را ستون شوی، نن یې په کابل کې د عسکرو د فراغت په مناسبت رابلل شویو مراسمو ته د خپلې وینا په مهال وویل، چې له افغانستانه د ناټو ځواکونو له وتلو وروسته هم د هغوی هوایي ملاتړ دوام مومي.

نوموړي وړاندې زیاته کړې، چې دولتي ځواکونه وړتیاوې لري او هیچا ته د حکومت د سقوط اجازه نه ورکوي.

خالد داسې مهال د بهرنیو ځواکونو د هوایي ملاتړ له دوام خبر ورکوي، چې له افغانستانه د امریکایي او ناټو عسکرو د وتلو لړۍ روانه ده او د روان میلادي کال د سپتمبر میاشتې تر یوولسمې نېټې ښایي بهرني پوځیان په بشپړ ډول له افغانستانه ووځي.

امریکا که څه هم له افغانستانه د خپلو عسکرو ایستل په افغانستان کې د خپل نظامي حضور پای نوموي، خو ټینګار لري، چې که د عسکرو تر ایستلو وروسته هم اړتیا پېښه شي، په افغانستان کې به خپل اهداف تعقیب کړي.

په وروستیو څو اوونیو کې بهرنیو عسکرو د خپلو داخلي افغان همکارانو له ملاتړ لاس اخیستی او یوازې په محدودو ځایونو کې يې پر طالب جنګیالیو هوایي بریدونه کړي، خو د تلفاتو په اړه یې لا هم معلومات څرګند نه دي.