اردوغان: د بهرنیو پوځیانو تر وتلو وروسته ترکیه د افغانستان د وضعیت د مدیریت لپاره د «باور وړ هیواد» دی

نن ټکی اسیا (یکشنبه، ۲۳ غبرګولی، ۱۴۰۰ل): د ترکیې ولسمشر «رجب طیب اردوغان» وایي، د امریکایي او ناټو ځواکونو تر وتلو وروسته به ترکیه یوازینی هیواد وي، چې د افغانستان د ثبات لپاره به کار کوي.

اردوغان چې بروکسل ته د سفر تر پيلېدو وړاندې يې د استانبول په هوايي ډګر کې د خبریالانو پوښتنې ځوابولې وویل، چې د ترکیې چارواکو د بهرنیو ځواکونو تر وتلو وروسته د افغانستان د ثبات په تړاو خپله طرحه له امریکايي چارواکو سره شریکه کړې او هغوی ترې خوښ دي.

نوموړي که څه هم ددې طرحې په اړه نور جزئيات وړاندې نکړل، خو په خبره یې، امریکا د افغانستان په تړاو په ترکیه حساب کوي او  د بهرنیو ځواکونو تر وتلو وروسته یوازینی د «باور وړ» هیواد وي، چې د افغانستان د ثبات لپاره به کار کوي.

د اردوغان په خبره، د بروکسل د ناستې په څنډه کې به د امریکا  له ولسمشر «جوبایډن» سره هم د افغانستان په اړه وغږېږي.

ورته مهال د ترکیې یوه چارواکي ویلي، چې که شرایط برابر شي هیواد یې په افغانستان کې د پوځيانو د ساتلو او د کابل هوایي ډګر د امنیت خوندي کولو ته چمتو دی.

دده له قوله، شرایط دا دي، چې د ناټو غړي هیوادونه باید په همدې برخه کې خپلې مالي او نظامي مرستې له ترکیې سره روانې وساتي.

ترکیه داسې مهال د بهرنیو ځواکونو تر وتلو وروسته افغانستان کې ښکېلتیا چمتووالی ښيي، چې له افغانستانه د امریکایي  او ناټو ځواکونو د وتلو لړۍ پنځوس سلنه بشپړه شوې او نږدې راتلونکې کې ښایي د ناټو نظامي حضور په افغانستان کې پای ته ورسېږي.

د بهرنیو ځواکونو د وتلو د پروسې له دوام سره په یو وخت د ناټو ټول تمرکز د کابل هوايي ډګر  د امنیت په  خوندي کولو دی او داسې راپورونه شته چې ښایي یاد مسئولیت ترکیې ته وسپارل شي.

بل لور ته طالبانو بیا ګواښ کړی، چې د هوايي  ډګر او یا سفارتونو د ساتلو په پلمه په افغانستان کې د بهرنیو پوځيانو شتون ورته د منلو وړ نه دی.

د طالبانو په خبره، که ترکي عسکر په افغانستان کې پاتې شي، دوی به د نورو بهرنیو پوځيانو په سترګه ورته وګوري او په وړاندې به یې ودرېږي.