ناټو: د چين پوځ ځواک او روان چلند يو ستر ګواښ دی

نن ټکی اسیا (سه شنبه، ۲۵ غبرګولي، ۱۴۰۰ل): د بلجيم پلازمېنې بروکسل کې د ناټو غړو هېوادونو استازو د چين پوځي ځواک په اړه خپله اندېښنه ښوولې او ويلي يې دي، چې د چين اوسنی پوځي ځواک او چلند يو «چلينج» دی.

د ناټو مشرانو د چين په اړه د خبرو کولو پر مهال ويلي، چين په ډېره چټکتيا په خپلو اټومي وسلو کې زياتوالی کوي، په نوې او پرمختللې طریقه له روسيې سره په ګډه پوځي همکاري کوي.

د ناټو سرمنشي ينس سټولټنبرګ خبرداری ورکړی، چې چين د ناټو پوځي او تخنيکي وړتياوو ته د رسېدو هڅه کوي، خو د دې هر څه سربېره د ناټو ټلواله له چين سره سړه جګړه نه غواړي.

ناټو د ۳۰ اروپايي او شمالي امريکايي هېوادونو يوه ستره سياسي او ځواکمنه پوځي ټلواله ده، چې له دوهمې نړیوالې جګړې وروسته د کميونيزم د ګواښ له منځه وړلو لپاره رامنځته شوې ده.

بل پلو اروپايي ټولنې لپاره د چين ډيپلوماټيک دفتر پر ناټو تور پورې کړی، چې د چين پر سوله‌ييز پرمختګ تورونه لګوي او زياته کړې يې ده، د چين پوځي وړتيا يوازې د دفاعي موخو لپاره ده.

د چين له لوري په  خپره شوې اعلاميه کې راغلي، چې هېواد يې د چا لپاره ګواښ نه پېښوي، خو که څوک د دوی پر وړاندې ګواښونه رامنځته کوي، چين به هم لاس تړلي نه پاتې کيږي.

په وروستيو وختونو کې د ناټو ټلواله له ګڼو ستونزو سره مخ ده او مشران يې د ناټو کړنو او فعاليتونو د غښتلي کولو لپاره د نوې بسپنې راټولو په موخه سلامشورې پيل کړي دي.

د ناټو ايتلافيانو ترمنځ روانې ناندرۍ د امريکا د پخواني ولسمشر ډونلډ ټرمپ د واکمنۍ پر مهال نورې هم زياتې شوې وې.

ډونلډ ټرمپ د خپلې واکمنۍ پر مهال ناټو لپاره د امريکا د بسپنې، بلکې د اروپايي متحدينو د دفاع لپاره د امريکا په مسؤوليت هم پوښتنې رامنځته کړې وې.

خو نوي ولسمشر جو بايډن د واک له تر لاسه کولو وروسته د ناټو په سرمشريزه کې د ګډون پر مهال يو ځل بیا ژمنه وکړه، چې متحده ايالتونه به په بشپړه توګه د ناټو ۷۲ کلنې ټلوالې ملګرتيا ته دوام ورکړي.

چين د نړۍ تر ټولو سترو پوځي او اقتصادي ځواکونو څخه يو دی، هلته کميونيسټ ګوند واکمن دی چې د هېواد ټولې پوځي، ټولنیزې او سياسي چارې پر مخ بيايي.

چين د نړۍ تر ټولو ستر پوځي ځواک دی، چې شمېر يې ۲۰ لکو ته رسيږي.