پي ايس ايل؛ حضرت الله ځاځي خپلې لومړۍ لوبه کې د چټکې نيمه سليزې ريکاډ مساوي کړ
نن ټکی اسيا (چهارشنبه، ۲۶ غبرګولی، ۱۴۰۰ل): د پاکستان سوپر ليګ سياليو پرمهال افغان چټک توپ وهونکي حضرت الله ځاځي په خپله لومړۍ لوبه کې د ياد ليګ د چټکې نيمه سليزې ريکاډ مساوي کړوه.
حضرت ځاځی چې د پېښور زلمي لوبډله کې په لومړي وار لوبيږي، او تېره شپه لومړی ځل ميدان ته ښکته شو، د پي ايس ايل د چټکې نيمه سليزې ريکارډ مساوي کړ.
هغه په ۱۷ توپونو نيمه سليزه ووهله، په داسې حال کې چې له دې وړاندې د پېښور زلمو لوبغاړي کامران اکمل او د اسلام اباد يونيټډ لوبغاړي اصف علي هم دغه ريکاډ خپل کړی و چې د دريواړو ترمنځ شريک ريکاډ شو.
نوموړي ټولټال یوازې په ۲۶ توپونو ۶۳ منډې وکړې، چې ۸ څلوریزې او ۴ شپږیزې هم پکې شاملې وې، نوموړی د خپلې غوره کارکردګۍ له امله د لوبې غوره لوبغاړی هم ونومول شو.
د حضرت ځاځي همدې چټکو منډو په مرسته د پېښور زلمو لوبډله وتوانېده چې د کراچي کنګز لخوا د ۱۰۹ منډو کوچنی هدف یوازې په ۱۱ اورونو کې پوره کړي.
په يادې بريا سره د پېښور زلمي لوبډله په لسو نمرو سره دوهم مقام ته پورته شوه، دوی تراوسه ۹ لوبې کړي، ۵ يې ګټلي او څلورو کې ماتې منلې ده.
بايد وويل شي چې په دغه سيالي کې افغان چاينا مين ځوان لوبغاړی نور احمد هم و، چې د کراچۍ لوبډلې له لورې ولوبېد، نوموړي ۳ اورونه وکړل او يوه ويکټه يې واخيسته.
Here's a treat for you. All the highs from @zazai_3’s stunning assault on @KarachiKingsARY#MatchDikhao I #HBLPSL6 I #PZvKK pic.twitter.com/6YVp2e1Re8
— PakistanSuperLeague (@thePSLt20) June 15, 2021
