طالبانو په پنځو ولایاتو کې ۵ نورې ولسوالۍ نیولي

نن ټکی اسیا (شنبه، ۲۹ غبرګولي، ۱۴۰۰ل): د طالبانو لخوا د ولسوالیو نیولو په دوام تیره شپه د هېواد په شمالي ولایاتو جوزجان او فاریاب، لویدیځ ولایت فراه او نمیروز ولایت او ختیځ ولایت پکتیا کې څلور نورې ولسوالۍ له دولتي ځواکونو څخه نیولي دي.

د طالب ویاندویانو ذبیح الله مجاهد او قاري یوسف احمدي لخوا رسنیو ته په استول شوو جلا جلا پیغامونو کې ویل شوي چې طالبانو تیره شپه د جوزجان ولایت مردیان،  د فاریاب ولایت خواجه سبزپوش(جمعه بازار)، د فراه ولایت پشتکوه، د نیمروز ولایت خاشرود او پکتیا ولایت میرزکې ولسوالۍ له ټولو ملحقاتو سره ددوی لاس ته لویدلي دي.

طالبان وايي، د دغو پنځو ولسوالیو د نیولو پرمهال نښتو کې یې لسګونه عسکر وژلي، ټپیان او اسیران کړي او شمېر نور تښتېدلي دي.

ددې ترڅنګ تیر ماښام د خواجه سبزپوش(جمعه بازار) ولسوالۍ پر مرکز د طالبانو د بریدونو له پیل سره همهاله ددې ولسوالۍ امنیه قومندان «کل اختیار عرب» له خپلو ټول پرسونل سره طالبانو ته تسلیم شو.

د پورته څلورو لسوالیو د نیولو پرمهال طالبانو ته په لسګونو میله درنه او سپکه وسله او یو شمېر ټانګونه او رینجر موټر هم په لاس ورغلي دي.

د فاریاب له لسو ولسوالیو څخه پنځه ولسوالۍ طالبانو نیولي او دا مهال د مرکز میمنې په څو کیلو مترۍ کې د جګړې لومړۍ کرښه قرار لري.