روغتیا

کرونا افغانستان: د مثبتو پېښو شمېر له ۱۰۰ زرو او د مړو شمېر له ۴ زرو پورته شو

نن ټکی اسیا (شنبه، ۲۹ غبرګولی، ۱۴۰۰ل): افغانستان کې د کرونا ویروس نږدې یو نیم کال وړاندې د فبروري په ۲۶مه نېټه په لومړي ځل خوله ولګوله چې تر ننه یې بېلا بېلو خپرو شویو څپو له ۱۰۰ زرو زیات کسان نیولي او له ۴ زره زیاتو ژوند یې اخیستی دی.

د عامې روغتیا وزارت د وینا له مخې تېرو څلورویشت ساعتونو کې ۴۳۸۹ شکمنې قضیې معاینه شوي، چې له مخې یې ۱۳۸۴ مثبتې ثبت شوي او ۹۲ کسانو خپل ژوند له لاسه ورکړی دی.

د یادو شمېر له مخې افغانستان کې د ټولو مثبتو پېښو شمېر ۱۰۱ زره ۹۱۶ ته ورسېد، په داسې حال کې چې د مړو شمېر ۴۱۲۲ ته پورته شوی دی.

یو شمېر روغتیا پوهان او ډاکټران په دې اند دي چې په هېواد کې د کرونا ناروغان او مړي له رسمي شمېرو څو چنده زیات دي، خو د روغتونونو ناکافي تجهیزاتو او وسایلو دغه شمېره نه ده ثبت کړې.

د عامې روغتیا وزارت وایي چې د هېواد ځوان قشر هم لا د روغتیایي اصولو پلي کولو ته ژمن نه دي او یوازې ۳۵ سلنه یې دغه لارښوونې عملي کوي او ماسک کاروي.

بل لوري ته د کرونا د پېښو زیاتوالي سره د هېواد په دولتي او خصوصي روغتونونو کې د ناروغانو لپاره بسترونه نه موندل کیږي، جدي ناروغان د اکسیجن او نورو طبي تجهیزاتو له کمښت سره مخ دي.

د رويټرز خبري اژانس د راپور له مخې په کابل کې د محمد علي جناح او افغان جاپان روغتونونو د کرونا ناروغانو پرمخ خپلې دروازې تړلي، د یادو روغتونونو ډاکټران وایي چې دوی د نویو ناروغانو لپاره بسترونه او کافي تجهیزات نه لري.

باید وویل شي چې په افغانستان کې د کوویډ-۱۹ ناروغۍ دریمې څپې له تېرې درې اونیو راهیسې خوله لګولې، چې له کبله یې حکومت ټولې ښوونیزې ادارې، عامه حمامونه او د واده تالارونه د ټاکلې مودې لپاره تړلې دي.

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx
()
x