ورزش

د ټیسټ اتلولۍ پایلوبه شپږمې ورځې ته وغځېده

نن ټکی اسیا (چهارشنبه، ۲ چنګاښ، ۱۴۰۰ل): د کرکټ نړیوالې شورا د ټیسټ اتلولۍ پایلوبه د خپلو اصلي ورځو څخه زیاته شپږمې ورځې ته وغځېده.

د نیوزیلاند او هندوستان ترمنځ دغه پایلوبه چې د انګلستان په ساوتمپن ښار کې ترسره کیږي د اورښت له کبله له ځنډ او خنډ سره مخ شوې ده.

د ټیسټ اتلولۍ په لومړۍ ورځ د سخت اورښت له کبله هیڅ لوبه ترسره نشوه آن د پچې ویشتلو فرصت هم ترلاسه نشو، راتلونکې ورځ د ورځې نیمه برخه لوبه ترسره شوه، خو تر پنځمې ورځې اورښت لوبه د ځنډ او خنډ سره مخامخ کړه.

د کرکټ نړیواله شورا غواړي د اورښت له کبله ضایع شوې لومړۍ ورځ راوګرځوي، چې په دې تړاو یې د شپږمې ورځې لوبې کولو پریکړه هم کړې ده.

تر دې دمه دواړو لوبډلو یوه یوه پاڼۍ ترسره کړې او هند لوبډلې خپله دوهمه پاڼۍ پېل کړې ده، چې د هدف له ټاکلو وروسته به نیوزیلاند لوبډلې ته د توپ وهنې فرصت ورکړي.

په لومړۍ پاڼۍ کې هند لوبډلې ۲۱۷ منډې جوړې کړې چې نیوزیلاند یې په ځواب کې د ټولو لوبغاړو په سوځېدلو ۲۴۹ منډې وکړې. په دوهم وار توپ وهنې سره هند د ۲ لوبغاړو په سوځېدلو ۶۴ منډې کړي او د ټيسټ په شپږمه ورځ به توپ وهنې ته دوام ورکړي.

د کرکټ نړیوالې شورا د اصولو له مخې د ټيسټ لوبه پنځه ورځې لري، او هره ورځ د ۹۰ اورونو درې پړاوه لري، خو د اړتیا پرمهال وروستی پړاو له ۳۰ تر ۹۰ دقیقو زیاتېدلی شي، دغه راز لوبې ته په کتلو د ځینې اصولو له مخې ټيسټ لوبه یوه ورځ زیاتېدلی یا کمېدلی هم شي.

د یادونې وړ ده چې د نړیوالې شورا ټیسټ اتلولیو سیالۍ په ۲۰۱۹م کال کې پېل شوې، چې د زیاتو نمرو له مخې نیوزیلاند او هند لوبډلو پایلوبې ته لار موندلې ده.

ورته لیکنې

ګډون وکړئ
خبرتیا غوښتل د
guest

0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx