طالبان؛ ولې فتحه په جنګ لمانځي؟!

استاد محمد زمان مزمل

طالب او ناراض ملاتړي:
د افغانستان پرګنې د بیګانوو د حضور او اشغال پر وړاندې حساسې پرګنې دي، هغه مهال چې طالب مشرانو د ټولو ډلو پر ضد نظامي کمپاین پر ینګي کلا ودراوه او پر طالب کې د بهرنیو جنګیالیو پر حضور یې نړۍ د افغانستان په اړه وپاروله د طالب ملاتړ پرګنې له طالب خپه او پر شا شوې.

همدلته وه چې د سپټمبر په هجوم کی له طالب نه چا ننګه وکړه او نه چا اوښکې تویې کړې، ولې کله چې امریکايي عسکر او افغاني کم ظرفو هغوی په خپل کور کی وچېړل د پردو او خپلو دا نا مرده غچ د ملت پر زړه هوار نشو، نو کرار کرار ملت او قومونه د طالب تر څنګ د بهرنیانو پر ضد ودرېدل او ښه په نره ودریدل تر دې چې واشنګټن دې ته ټیټ شو چې تروریست طالب ته په قطر کی دفتر ورکړي او په دویم قدم کی د طالب سره یو طرفه او هغسی تړون امظاء کړي چې د جزیاتو په هکله یې ارګ په تیاره کې وساته.

نن چې امریکا د شوي تړون مطابق روانه ده، اډې ورانوي، وسایل لیږدوي او بیا هم په افغانستان کې د تېر په نسبت جنګ خوله لګولې د خلکو کلیو او کورو ته د ځوانانو په وینو سره جسدونه ورځي ،داسې  ښکاري چې ملت او پرګنو ډېر د طالب پر ضد د خپګان تآثر اخیستی، بلکې کیدای شي آن د طالب پروني ملاتړي هم پکې ستړي او ناهیلې شي.

ولې طالب جنګیالي د امریکا په وتلو نۀ د کورونو د ورانۍ لاس واخیست او نه د خلکو د پچیانو له وژلو بلکې  په داسې حال کې چې جګړه بې رحمانه روانه ده په قطر کی دواړه طرفه کابل او طالب مشران ایله جانانه د قطر د هوټلو کبسې او سلاد کوده کوي.

فتحه نه ښایي په جنګ ولمانځل شي:
د خدای پیغمبر د وحیې په حساب چې وایی: وَأَنْتَ حِلٌّ بِهَٰذَا الْبَلَدِ.
پوهېده چی دې خپل پلرني کلي مکې مکرمې ته فاتح ننوتونکی ده، نو وې غوښتل چې ددغه فاتحانه ننوتلو لپاره یؤ سوله يیز مسیر جوړ کړي، تر څو د پروني مکې کونډې، بوډاګان، بلکې پروني حریفان په دې پوه کړي چې هغه د غچ او جنګ نه په فارغو مراسمو خپل ابایي کلي ته راځي.

نن چې امریکایان په وتلو کې دي، طالبان باید په خپل ملت ابایي افغانستان باندې د جنګ کیږدۍ را نسکوره نکړي فتحه په ټولو مهذبو ملتونو کې په سوله لمانځل کېږی، نه په جنګ.

آیا د امریکا له وتلو بله پورته فتحه شته؟؟؟