امريكا د خپل سفارت د خوندیتوب لپاره ۶۵۰ عسکر په افغانستان کې پرېږدي

نن ټکی اسیا (شنبه، ۵ چنګاښ، ۱۴۰۰ل):د اسې مهال چې د امریکا د متحده ایالاتو ولسمشر اعلان کړی، په افغانستان کې خپله اوږده جګړه پای ته رسوي او د راتلونکې سپتمبر میاشتې تر یوولسمې نېټې خپل عسکر له افغانستانه وباسي؛ یو شمېر امریکایي امنیتي چارواکي وايي، دا هیواد هوډ لري د عسکرو تر ایستلو وروسته هم شپږ سوه پنځوس پوځيان د سفارت د خوندیتوب لپاره په افغانستان کې پرېږدي.

یوه امنیتي چارواکي اسوشیټيد پریس خبري اژانس ته ویلي، چې امریکا به په کابل کې د خپل سفارت او شته ډیپلوماټانو د خوندیتوب او د ډيپلوماټيک ماموریت د دوام په موخه شپږ سوه پنځوس عسکر د سپتمبر تر یوولسمې وروسته هم په افغانستان کې وساتي.

د سرچینې له قوله، په راتلونکو دوو اوونیو کې به د عسکرو د ایستلو پروسې یوه ستره برخه بشپړه شي، خو سلګونه نور عسکر به هم د سپتمبر تر میاشتې په کابل هوایي ډګر کې پاتې شي، تر څو له ترکي عسکر سره ددې هوایي میدان د امنیت په خوندیتابه کې مرسته وکړي.

سلګونه امریکایي عسکر داسې مهال د امریکایي سفارت د خوندیتوب لپاره په کابل کې دیره کېږي، چې طالبان وايي، د سفارتونو د ساتونکو او په بل هر نامه باندې د عسکرو شتون ورته  د منلو وړ نه دی او که یو بهرنی عسکر په افغانستان کې پاتې شي، بیا به یې هم دوی په وړاندې ودرېږي.