اردوګان او له هغه سره د افغانستان په ګټه د هوایي ډګر معامله

محمد طاهر ثابت
که رښتیا سي اردګان اولنی ترکی مشر دی چې له عثماني امپراتور نه وروسته د خپل دولت په ګټو پسې ګرځي. په همدې دلیل اردګان امید بښونکی او خطرناک کس دی. هغه د غرب نه د ترکیې د آزادۍ خوب ویني او هم د بې کسه مسلمانو سرداري غواړي.

دا چې تر کومه هغه د مسلمانو په خیر پسې ګرځي د سوال وړ نه بلکه د ښه ځواب ورکولو وړ مسئله ده: هغه مشکل چې باید نابغه مشران یې حل کړي.

اردوګان د امریکایي مزدور عسکر په څیر د افغانستان ټور آف ډیوټي(عسکري ماموریت) د امریکا د صهیونستي مشر له وخته په غاړه اخیستی دی. هغه د افغانستان د اشغال په وخت کې صرف عسکر پاتې و، خو د عسکري قشلو نه د باندې د ترکي مکتبو مؤسس و چې ګمان کیږي ډیر طرزیان به یې تربیه کړي وي او وروسته به د اردګانیزم په صفو کې د افغانستان د تجزیې زهرجن خواړه برابر او یا به د پان ترکیزم د جنګ په میدان کې ځانونه انتحاریان کړي.

د اردګان نوې خبرې، چې طالبان باید افغانستان اشغال نکړي، د همدې پان ترکیزم راټوکیدلې منحوسې پروسې ته اشاره کوي. د بدنامه مارشال او د پوه ناپوهه سقاویانو تایید او قراردادونه به د اردګان بری او د افغانستان ناکامي وبولو.
د کابل د پنجپدرو سیاسیونو، ادارې او خبریالانو سکوت او تسلیمي به یو تاریخي جهل او خیانت وز، چې هغه به د همیش لپاره ثبت کړو او دا باید یو ملي خیانت وبلل سي.

اردګان د ترکیې په میدان کې د امریکا قراردادي و چه اول یې امریکایي او یا د امریکا په لومه کې لویدلي مسلمانان تقویه کړل او بیا امریکا په هغوی باندې ورمرش کړ چې په نتیجه کې سوریه د افغان سقاویانو د وخت دوهم افغانستان سوه.
اوس داده د سوریې په دریمه برخه کې اشغالګر دي.

که څه هم اردګان د عراق د اشغال په وخت کې څه ډرامه پیل کړه خو بیاهم هغه هلته شریک و. د عراق د اشغال راپدیخوا هغه د کردانو په ټکولو او وژنو باندې مصروف دی.

د لیبیا په صحنه کې اردګان نه تنها لیبیا اشغال کړه بلکه هغلته یې د لیبیا رسمي حکومت تر خوږیدلې ګوتې نیولی او د خپل ځان په ګټه یې اقتصادي تړونونه باندې لاسلیک کړل چې په دې لارې یې لیبیا د زیاتو دولتونو سره دښمنه کړه.

اردوګان ځان ښه مسلمان بولي او اوس یې طالبانو ته اخطار ورکړی چې افغانستان اشغال نکړي او جنګ دې پریږدي چې ښه اسلامي کار ندی.

په دې به عمران خان خطا کړي خو ټول مسلمانان غولولای نسي. هغه په خپله خاوره کې د ګولن ډلې غړي په بې رحمه ډول یا مړه او یا زنداني کړل. د اسلام په نامه راپورته سوي مدافعین یې بندیان کړل او د کردانو په وژنه باندې له اوله بوخت دي. په سوریه او لیبیا کې یې مسلمانان مړه کړل او د صومالیا په مسلمانانو یې هم زړه نده خوږ سوی. نو اوس داسې توره کټوه به څنګه نور سپین کړي.
په صومالیا کې اردګان عسکري قشلې لري او هلته له عربو سره سیالي کوي.

اردګان له اسرائیلو سره د فلسطینیانو په سر یوه ډرامه جوړه کړه او له سعودي او مصر سره یې په ظاهره د هغوی په داخلي مشکلاتو باندې اختلاف او رقابت پیل کړ.
دې ډرامو ځینې خلک اردګان ته خوشبین کړل خو په رښتیا کې هغه د خپل اقتصاد لپاره دا کارونه وکړل او یا یې د ځان نه د مهم سړي جوړولو لپاره یوه پروسه په لار کې واچوله.

اردګان په منځنۍ اسیا کې د ترک نژادانو دولتو سره ټولنه جوړه کړې چې په هغې ټولنه کې د افغانستان ترکتباره ګاونډیان شریک دي او زما په ګومان افغانستان د ناظر صفت لري. طالبانو ته اخطار ورکول هم په دې اساس دي. اردګان ځان د ترکانو پهلوان جوړوي نه د مسلمانانو مدافع او د اسلام لپاره مبلغ.

اوس ترکیه د ناټو غښتلې شریکه ده. په لنډو تیرو میاشتو کې ناټو ترکیې ته مهم ماموریتونه سپارلي دي. د هغو په جمله کې منځنۍ اسیا او افغانستان شامل دي. ترکیه په دې خوښه ده چې د انټي ټام غوندې د خپل بادار د خوښې په خاطر د هغې د همنژادو غلامي نوره هم وغځيږي او لا زوروره سي. ددې ماموریتو په دوران کې به کیدای شي اردګان د ترکیې د راتلونکي امپراتور خوبونه ویني.

نو ځکه افغانستان باید د انټي ټام صفت په نظر کې ولري او له هغه سره سره د اردګان د امپراتورۍ د خوبو د تعبیر بڼه بدله کړي ترڅو هم افغانستان آزاد وي، متحد وي او د سولې خنډونه یې له مینځه وړي وي او هم د اردګان خوبو ته څه تطبیقي تعبیر جوړ کړي.

اردګان د افغانستان په میدان کې د نوي نعمتو هیله لري. امریکا چې د اردګان د امپراتورۍ خوبونه یې ښه نه ایسي، په اردګان بندیزونه لګولي. له افغانستان نه د پردیو د وتلو نه وروسته د کابل د هوایي ډګر په اجرتي ماموریت کې هغه له خپل بادار نه د ترکیې د سیاستو ملاتړ غوښتی، مالي اجرت ته یې هیله ښودلې او که ضرورت سي نو هر بل کمک چې په هغه کې به نظامي سامان الات هم شامل وي. په دې کې د اولې غوښتنې اهمیت دا دی چې د اردګان د امپراتورۍ په مقابل کې چې کوم غربي قهر راپورته سوی هغه به کم سي او د امریکا د منطقې نور غلامان به اردګان ته ازار نه ورکوي. ترکیه به بیرته د امریکا په ښو غلامانو کې وشمېرل شي او اقتصادي یا نظامي بندیزونه به باندې پای ته ورسیږي. دریم کومک به د اول کومک سره یو ځای او نظامي بندیزونه به باندې عملي ختم سي.

په لنډ ډول اردګان هم مزدور دی او هم تجار. اردګان ددې مزدورۍ په ذریعه ترکي استعمار ته لاره هواروي. په افغانستان کې به نه تنها د مزدور دولت ملاتړ وکړي او د هندوانو سره به په یوه صف کې ودریږي (اوس یوازې هند د کابل د مزدورې ادارې  سیاسي او نظامي کومک کوي) بلکه اردګان به د ترکتبارو ملاتړ او هغه به یا د افغانستان له خاورې بیل کړي او یا به یې په اکثریت مسلط کړي. اردګان ته اسلام مهم ندی. هغه خپله د یوه بې دینه دولت مشر دی. اسلام او بې دیني نسي يو ځای کیدای.

مونږه مخته چیرې لیکلي وو چې که طالبان هوښیار سي نو له اردوګان سره به نوې توافقنامه امضاء کړي. اوس دا ده اردګان د طالبانو د اخطار له کبله خبرو ته راغلی.

مونږه هیله لرو طالبان به د پورتني خطرو د مخنيوي په خاطر داسې ټکي واچوي چې هغه هم د اسلامي، آزاد، مستقل، متحد او عادل مشترک دولت تضمین وکړي او هم د هغه په زور د کابل هوایي ډګر د هند او نورو دولتو د نظامي وسایلو د قاچاق ځای نسي. ددې سره سره طالبان باید نور داسې شرطونه وړاندې کړي چې هغه به د امریکا او ترکیې د توافقنامې مثل وي. هغه دا چې ترکیه به د طالبانو د اوسني او راتلونکي سیاسي، اقتصادي او نظامي پالیسیو ملاتړ وي، هغوی به له طالبانو سره مالي کومک کوي او د هندي او امریکایي سلاحو په مقابل کې به مدافع سامان الات ورکوي. هغه امریکایي سامان الات چه ویجاړ سوي هغه به طالبانو ته ترمیموی او داسې نور. دا چې دا به تر کومه ومنل سي هغه به د مذاکراتو په ډګر کې د طالبانو په هوښیارۍ او جرئت باندې ولاړې وبولو.

هیله ده طالبان له خپل بریالي موقف نه استفاده وکړي او اوس د یوه دولت رسمي نماینده په ډول په جرئت سره خپلې غوښتنې په نورو تحمیل کړي.

و ما ذلک علی الله بعزیز