شعـــــرونه

له هر زړه نه وينې څاڅي/ نومير

فدا محمد نومير

د باروتو په اور سوځي زما ښکلی کندهاره!
بيا چا سترګې برګې کړې د ميرويس نيکه دياره

نارنج بيا سو  لوټې لوټې کنډواله کړ افشاريانو
چاته وژاړم په وينو د حسين د زړه پرهاره

د زينب بولوله اورم خو افغان په غوږو کوڼ دی
پر برجو باندې نارې کا د بيګا نه تر سهاره

د زابل په هسک حصار کې د افشار د يرغل خنډه
دواړه سترګې يې بايللې قوماندان سيدال سالاره

ازاد ګير دی بايجان  کې د راتلو يې لاره نسته
چې چاپير کا خپل فوځونه ګر چاپيره دې له ښاره

د امان دې نن کمی دی ځکه خوار او زار دې وينم
دی په فتحه دې وتلی دی په دښتو او کهساره

کندهاره بيا کوڅې دې د زلمو په وينو سرې دي
د زخمو خبر دې رسي تر پکتيا او ننګرهاره

د نازو بچيان قتليږې زرغونه په ساندو وير ده
احمدشاه وتی له کوره په ډهلي يې دی يلغاره

فتح خان قبر کې بند دی ايوب بوخت دی په  ميوند کې
ملالۍ رپی په لاس کې د جهاد ناره پر لاره

د بولدک تورپیکۍ نسته چې ناره دې په زلمو کړي
کور دننه کې په عيش دي څو راهزن او داړه ماره

د يو څو نا اهلو لاس کې سخت راګير ېې زما ټاټوبيه
هيڅ دې دم موندلی نه دی حاکمان دې دي لوټماره

علماء لاس په زارۍ دي په الله (ج) دې امان غواړي
سر بلند په جهان  اوسې ای ميراث د نيکه، پلاره

که دعا به زما قبليږي خدای دې ساته له ورانۍ نه
ذليل غوښتی مې له ربه ستا دښمن او ستا اغياره

چې بچو دې  خوار ذليل کړه د وحشت واړه لښکرې
وار راغلی د وحدت دی هميش اوسې برقراره

د ډهلي تخت ورته هيڅ و چې بې ياد سوه دنګ هسک غرونه
واشنګټن ، پاريس ، لندن دې تر خټين کورونو جاره

د نومير دې سي قبولې دعاګانې ستا په حق کې
له هر زړه څه وينې دارې  فوارې دې هم  افشاره

متحده ايالات ، کلفورنيا

نوټ :
۱- نارنج = د کندهار تاريخې ښار ( نارنج ښار ، زوړ ښار
۲- حسين = شاه حسين هوتک
۳زينب = د حاجي ميرويس خان نيکه لور د شاه حسين هوتک او شاه محمود هوتک خور.
۴سيدال = سيدال خان ناصر د هوتکي کورنۍ نامتو او وتلی جرنيل .
۵ ازاد = ازدخان افغان د هوتکي دورې نوميالی جرنيل او د ازربايجان فاتح .
۶- بايجان = ازربايجان
۷امان = جرنيل امان الله خان د هوتکي امپراطوری مخکښ جرنيل .
۸- نازو = نازو انا د حاجي ميرويس خان نيکه مور.
۹زرغونه = زرغونه انا د در دوران اعليضرت احمدشاه بابا مور.
۱۰- احمد شاه = احمدشاه بابا.
۱۱- فتح خان = سردار وزير فتح خان .
۱۲- ملالې = د ميوند د غزا اتله ميرمن ملاله.
۱۳تورپيکۍ = د بولدک د غزا اتله ميرمن تورپيکۍ
۱۴اشاره ده داحمدشاه بابا شعر ته = د ډهلي تخت هيرومه + چې را ياد کړم زما د ښکلې پښتونخوا د غرو سرونه.

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx
()
x