د ملا برادر اخند په مشرۍ د طالبانو لوړپوړی پلاوی چين ته تللی

نن ټکی اسیا (چهارشنبه، ۶ زمري، ۱۴۰۰ل): د طالبانو سياسي مرستيال او په قطر کې د سياسي دفتر مشر ملا عبدالغني برادر اخند د يوه لوړپوړي پلاوي په مشرۍ چين ته تللی دی.

د قطر دفتر سرچينو تاييد کړې، چې د ملا برادر اخند په مشرۍ لوړپوړی پلاوی چين ته رسېدلی او هلته به د چين له چارواکو سره د دوه اړخيزو اړيکو سربېره د افغانستان سولې بهير په تړاو بحثونه وکړي.

له ملا برادر اخند سره په دې سفر کې د قطر دفتر نور غړي مولوي عبدالسلام حنفي، ملا خیرالله خیرخوا، شيخ شهاب الدين دلاور، مولوي مطيع الحق خالص، عمار ياسر، نبراس الحق عزيز د دفتر دواړه ويندويان محمد سهيل شاهين او ډاکټر محمد نعيم هم ملګري دي.

په دې وروستيو وختونو کې طالبانو د هېواد په شمال، مرکزي ولايتونو، جنوب او جنوب غرب کې بې ساري پرمختګونه کړي او د دغو پرمختګونو په لړ کې يې له چين، ترکمنستان، تاجکستان، ایران او پاکستان سره ګډې پولې او سوداګريز بندرونه هم نيولي دي.

د طالبانو د سياسي دفتر پلاوي په داسې حال کې چين ته سفر کړی، چې طالبانو د بدخشان ۲۷ ولسوالۍ او له چين سره ګډه پوله نيولې ده.

سره له دې، چې طالبان له تېرو څو کلونو راهيسې له چين سره راشه درشه او ښې اړيکې لري، خو وړمه ورځ د چين د بهرنيو چار وزير وانګ يي اندېښنه ښکاره کړې وه، چې د بدخشان له ګډې پولې سره د چين سنکيانګ ايالت کې ايغوري مسلمانان پراته دي او  دوی اندېښنه لري، چې هلته به ناامني او ګډوډي رامنځته شي.

ویل کيږي، د ملا برادر اخند په مشرۍ دغه پلاوی به له چينايي چارواکو سره په خبرو کې هغوی ته ډاډ ورکړي، چې د افغانستان له سرحده ډاډمن و اوسي.

د سياسي دفتر استازو تر دې وړاندې ترکمستان، ایران او روسيې ته هم سفرونه کړي او د يادو هېوادونو چارواکو سره يې د دوه اړخيزو اړيکو او سولې بهير په اړه خبرې کړي او هغوی ته يې ډاډ ورکړی، چې د دوی مبارزه يوازې د خپل هېواد د خپلواکۍ او اسلامي نظام د راتلو لپاره ده او له هېواده بهر هېچا ته ګواښ نه پېښوي، بلکې ښې اړيکې ورسره غواړي.

طالبانو په خپلو تکراري اعلاميو او رسمي څرګندونو کې ويلي، چې دوی له هېواده بهر د مداخلې اجنډا نه لري او نه هم په خپلو چارو کې بل چا ته د مداخلې اجازه ورکوي.

طالبانو له امريکا سره د دوحې په تړون کې هم ويلي، هيچا ته به اجازه ور نه کړي، چې د افغانستان خاوره د نورو هېوادونو پر خلاف وکاروي.

د چارو څارونکي وايي، طالبان په دې توانېدلي، چې په سختو حالاتو کې د سيمې او نړۍ هېوادونه پر خپله داعيه قانع کړي، چې دوی يوازې د خپل هېواد د ازادۍ لپاره مبارزه کوي او د نورو چارو کې لاسوهنه نه کوي.